Ispaniyada yuz bergan dahshatli poyezd halokati oqibatida kamida 68 kishi qurbon bo‘ldi. Mamlakatda uch kunlik motam e’lon qilingan bo‘lsa-da, Ispaniya rejimi jamoatchilikning jiddiy e’tirozlari va transport xavfsizligi bo‘yicha chuqur tanqidlarga duch kelmoqda. Bu fojia Yevropa Ittifoqiga a’zo ushbu davlatda bir yil ichida sodir bo‘lgan ikkinchi yirik temiryo‘l halokati hisoblanadi va butun qit’a bo‘ylab transport tizimlarining ishonchliligi borasidagi xavotirlarni kuchaytirmoqda.
Falokat Madrid janubidagi Kastiliya-La-Mancha mintaqasida yuz bergan. Davlatga qarashli RENFE kompaniyasining tezyurar poyezdi xususiy Iryo operatorining to‘xtab turgan sostaviga borib urilgan. Halokat joyidan qutqarilgan britaniyalik sayyohning so‘zlariga ko‘ra, birinchi va ikkinchi vagonlar bir zumda majaqlanib ketgan hamda hamma yoq qonga belangan. Qutqaruv brigadalari tuni bilan temir-tersak uyumiga aylangan vagonlar ichidan jasadlar va omon qolganlarni qidirish bilan shug‘ullandi. Yaqin atrofdagi Urda shaharchasi aholisi esa zudlik bilan birinchi tibbiy yordam va ko‘rpa-to‘shaklar yetkazib berishga majbur bo‘ldi.
Ispaniya rejimi vakillari vafot etganlarning shaxsini aniqlash uchun qarindoshlardan DNK namunalarini yig‘ishni boshlagan, ammo qurbonlar soni hali ham oshishi mumkinligi aytilmoqda. Transport vaziri Oskar Puente mazkur hodisani yo‘l uchastkasida avtomatik boshqaruv tizimi ishdan chiqqanidan so‘ng poyezd harakatiga ruxsat berilgani bilan izohlashga urindi va ushbu qarorni "tushunarsiz" deb atadi. Ma’lum bo‘lishicha, xavf tug‘ilganiga qaramay, RENFE poyezdi 25 kilometr masofani to‘siqsiz bosib o‘tib, stansiyada turgan poyezd bilan to‘qnashgan.
Ispaniya rejimi rahbari Pedro Sanches voqea joyiga tashrif buyurib, tergov o‘tkazish va xavfsizlikni kuchaytirish haqida go‘yoki va’dalar berdi. Ammo jamoatchilik bu bayonotlarga shubha bilan qaramoqda, chunki shu yilning yanvar oyida ham Andalusiyada poyezd izdan chiqib, 46 kishining umriga zomin bo‘lgan edi. Bo‘lajak umumiy saylovlarga sanoqli haftalar qolgan bir paytda ro‘y bergan mazkur fojia Ispaniya rejimining texnologik va boshqaruvdagi muammolarini butunlay yuzaga chiqarib qo‘ydi.
Source: www.dw.com