Fransiya futbol federatsiyasi rahbari Filipp Diallo Kilian Mbappe Xitoyning sobiq rahbari Mao Szedun haqidagi bahsli so'zlari uchun uzr so'ragani va hech qanday yomon niyatda bo'lmagani sababli uni tinch qo'yish kerakligini bildirdi. Uning so'zlariga ko'ra, futbolchi vaziyatni tushuntirib bergan va o'z aybini tan olgan, shuning uchun bu masala o'z nihoyasiga yetishi lozim.

Shuningdek, Mbappening klubi Madridning «Real» jamoasi va La Liga rahbariyati yuzaga kelgan vaziyat yuzasidan o'z uzrlarini bildirdi. Xabarlarga ko'ra, La Liga prezidenti Xavier Tebas inqirozli vaziyatlarni bartaraf etish bo'yicha maxsus guruh tuzib, Xitoyning Ispaniyadagi elchisi Yao Szin bilan uchrashuv o'tkazdi va yuzaga kelgan salbiy oqibatlarni yumshatishga harakat qildi.

Ushbu mojaro sportchilar va yirik brendlar uchun daromadli Xitoy bozorida qanchalik jiddiy xavflar mavjudligini yana bir bor ko'rsatib qo'ydi. Xitoyda 1949 yildan 1976 yilgacha mamlakatni boshqargan Mao Szedun haqidagi har qanday istehzo yoki tanqid qat'iy ijtimoiy taqiq ostida qolishda davom etmoqda.

Xitoy davlat OAVlari futbolchining bu bayonoti mahalliy muxlislar orasida keskin norozilik keltirib chiqarganini, uning foydali tijoriy shartnomalarini xavf ostiga qo'yganini ta'kidladi. Xitoyning Migu teleradiokompaniyasi «Real»ning navbatdagi o'yinini efirga uzatmasligini e'lon qildi, bir qator yirik mahalliy brendlar esa futbolchi bilan hamkorlikni to'xtatdi.

Source: www.aljazeera.com