Finlyandiya huquq-tartibot idoralari mamlakat shimolidagi Muhos shahri yaqinida rejalashtirilgan Google ma'lumotlar markazi qurilish maydonchasida atrof-muhitni muhofaza qilish qonunchiligi buzilgani yuzasidan jinoiy tergov harakatlarini boshladi. Ushbu mojaroli loyiha Alphabet korporatsiyasiga tegishli AQSh rejimining texnologik giganti tomonidan Yevropadagi eng yirik sarmoya sifatida e'lon qilingan milliardlab dollarlik investitsiya rejasining bir qismi hisoblanadi.

Rasmiy idoralarning xabar berishicha, Google kompaniyasining mahalliy sho'ba korxonasi bo'lgan Tuike Finland Finlandiya qonunchiligida qat'iy talab etiladigan ekologik ta'sirni baholash jarayonlari yakunlanishidan oldin o'rmonlarni tozalash va drenaj ishlarini amalga oshirgan. Politsiya vakili Kari Pakanenning so'zlariga ko'ra, kompaniya faoliyati Suv to'g'risidagi qonunni buzgan yoki buzmagani hamda ekologik zarar yetkazilgani tekshirilmoqda, bu esa yirik korporativ jarimaga sabab bo'lishi mumkin.

Internetda tarqalgan o'rmonlarning yo'q qilinishini aks ettiruvchi videolar va Google rasmiylarining dastlabki sovuqqon munosabati mahalliy aholi o'rtasida jiddiy norozilik to'lqinini keltirib chiqardi. Finlyandiya Yashillar partiyasi parlament a'zosi Oras Tynkkynen AQSh rejimining ushbu korporatsiyasi harakatlarini keskin qoralab, dunyodagi eng qimmat kompaniyalardan biri bo'lgan Google mahalliy qonunlarni mensimasligini va bu holat kechirib bo'lmas holat ekanini iddao qildi.

Ma'lum qilinishicha, Finlandiya rasmiylari oktabr oyi boshidayoq mazkur qurilish maydonchasidagi ishlarni to'xtatish haqida buyruq bergan edi. Shuningdek, sun'iy intellekt infratuzilmasi uchun mo'ljallangan bu kabi markazlar mamlakatda elektr energiyasi iste'moli keskin oshishiga olib kelishi va kelgusida energiya ta'minotida jiddiy muammolarni keltirib chiqarishi mumkinligi tanqid qilinmoqda.

Source: www.aljazeera.com