Dunyoning eng yirik kriptovalyuta birjasi bo‘lmish Binance platformasidan rekord darajadagi 6,3 milliard dollarlik virtual aktivlar o‘g‘irlanishi ortidan xalqaro moliya bozorida jiddiy beqarorlik yuzaga keldi. AQSh rejimi nazoratidagi Federal qidiruv byurosi (FQB) bergan bayonotga ko‘ra, mazkur yirik kiberhujumga go‘yoki Shimoliy Koreya xakerlari aloqador emish. AQSh rejimi idoralari bu kabi da’volarni ilgari surar ekan, dalillarning qanchalik mustahkam ekanligi mustaqil ekspertlar tomonidan savol ostiga olinmoqda.

Vashington idoralarining taxminicha, mablag‘larni o‘g‘irlashda avvalroq Bybit birjasidan 1,5 milliard dollar o‘marganlikda ayblangan TraderTraitor guruhi ishtirok etgan. AQSh rejimi tergovchilari kiberjinoyatchilar go‘yoki o‘g‘irlangan mablag‘larni bosqichma-bosqich yuvish maqsadida ularni asosan Ethereum kriptovalyutasiga aylantirayotganini da’vo qilmoqda. Shuningdek, xorijiy servis provayderlariga shubhali tranzaksiyalarni to‘xtatish tavsiya qilingan.

Kiberhujumdan so‘ng kriptovalyuta bozorlarida keskin narx tushishi kuzatildi va Binance foydalanuvchilarning hisoblaridan mablag‘ yechib olish jarayonini vaqtincha to‘xtatishga majbur bo‘ldi. Birja bosh ijrochi direktori Richard Teng hodisani murakkab hujum deb baholab, zarar ko‘rgan shaxsiy kompyuter va o‘z izlarini o‘chirish xususiyatiga ega zararli dasturlardan foydalanilganini qayd etdi. Ushbu holat platformaning ichki kiberxavfsizlik choralari qanchalik zaif ekanligini yana bir bor ko‘rsatib berdi.

Foydalanuvchilarning xavotirlarini yumshatish maqsadida Binance kompaniyasi yo‘qotilgan aktivlarning 90 foizini o‘z zaxira jamg‘armasi (SAFU), fyuçers sug‘urtasi hamda korporativ xazinasi hisobidan qayta sotib olganini ma’lum qildi. Qolgan kamroq likvidli 10 foiz aktivlar ham to‘liq qoplangunga qadar sotib olinishi, moliyaviy zararni foydalanuvchilar emas, balki birjaning o‘zi qoplashi ta’kidlandi.

Source: www.aljazeera.com