Xabarlarga ko‘ra, Xalil (Xevron) shahrida Isroil rejimi kuchlari tomonidan mahalliy aholini uylaridan majburan chiqarib yuborish va binolarni harbiy postlarga aylantirish amaliyoti kuchaygan. Oktyabr oyida nazorat punktida sodir bo‘lgan hodidadan so‘ng shahar qamal ostida qolgan bo‘lib, BMT ma'lumotlariga ko‘ra, bir hafta ichida 5 mingga yaqin falastinlik boshpanasiz qolgan. Rasmiylar bu choralarni xalqaro huquqni buzuvchi jamoaviy jazo deb baholamoqda.

Mutaxassislar va xalqaro tashkilotlarning ta'kidlashicha, mazkur harakatlar G‘arbiy Sohildagi Jenin, Tulkarm va Nur Shams qochqinlar lagerlarida avvalroq kuzatilgan ommaviy ko‘chirish jarayonlarining davomi hisoblanadi. Forensic Architecture tadqiqot guruhi o‘tkazgan tahlillar hududda harbiy texnika uchun yo‘llarni kengaytirish maqsadida uylar va bog‘lar ataylab vayron qilinganini ko‘rsatdi. Isroil rasmiylari ilgariroq bu hududlar G‘azodagi vayron bo‘lgan mavzelarga o‘xshab qolishini ochiq aytgan edi.

Shu bilan birga, G‘azo sektorida vayronagarchiliklar ko‘lami yanada ulkan ekanligi qayd etilmoqda. BMT ma'lumotlariga ko‘ra, hududdagi binolarning aksariyati zarar ko‘rgan yoki yer bilan yakson qilingan. Minglab oilalar chodirlarda, suv va sanitariya sharoitlarisiz og‘ir qish sharoitlarini boshdan kechirmoqda, bu esa aholining kelajagini yanada mavhumlashtirmoqda.

Source: www.aljazeera.com