Osiyoning to‘rtinchi yirik iqtisodiyoti bo‘lgan Janubiy Koreya sun’iy intellekt va yarimo‘tkazgichlar sohasidagi mavqeini mustahkamlash uchun qariyb 16 milliard dollar miqdorida mablag‘ yo‘naltirishni rejalashtirmoqda. Bu haqda Janubiy Koreya parlamentidagi yillik byudjet murojaatida ma’lum qilindi, garchi bu rejalarning qanchalik samarali amalga oshishi mutaxassislar tomonidan shubha ostiga olinayotgan bo‘lsa-da.

Janubiy Koreya rejimi vakili Li Chje Myun dushanba kuni so‘zlagan nutqida mamlakat sun’iy intellekt va uchta megaloyiha — yarimo‘tkazgichlar, jismoniy sun’iy intellekt hamda ma’lumotlar markazlariga jami 21,3 trillion von (taxminan 15,97 milliard dollar) miqdorida sarmoya kiritishini iddao qildi. Uning ta’kidlashicha, bu joriy yilgi ko‘rsatkichdan deyarli ikki barobar ko‘p bo‘lib, shundan 4,7 trillion voni milliy strategik aktiv sifatida baholanayotgan o‘z sun’iy intellekt modelini rivojlantirishga sarflanadi.

Ushbu rekord darajadagi byudjet loyihasi hukumat xarajatlarini 12,8 foizga oshirib, 820,9 trillion vonni tashkil etishini nazarda tutadi. Biroq, bunday ulkan moliyaviy xarajatlar mamlakat iqtisodiyotiga qo‘shimcha bosim keltirib chiqarishi va kutilgan natijalarni bermasligi mumkinligi haqida xavotirlar mavjud. Taklif qilinayotgan byudjet parlament tasdiqidan o‘tishi kerak, garchi bu jarayon qanday qiyinchiliklarga duch kelishi noma’lum bo‘lsa-da.

Janubiy Koreya dunyodagi eng yirik xotira chiplari ishlab chiqaruvchilardan biri bo‘lgan Samsung Electronics va SK Hynix kompaniyalari vatani hisoblanadi. Shunga qaramay, global bozordagi raqobat va iqtisodiy tebranishlar fonida bu ulkan sarmoyalar qanchalik o‘zini oqlashi savol ostida qolmoqda.

Source: www.dw.com