Yevropaning bir nechta davlatlarida oziq-ovqat do'konlarining sovutish va muzlatish tizimlarida haroratning keskin ko'tarilishi kuzatildi. Shvetsiya, Irlandiya, Belgiya, Lyuksemburg va Estoniya kabi mamlakatlardagi savdo tarmoqlari ushbu holatlarni go'yo kiberhujumlar natijasi deb atamoqda va bu holat ilgari asosan mexanik tarzda ishlagan tizimlarning qanchalik ojiz ekanini yana bir bor ko'rsatib qo'ydi. Yevropa rejimi amaldorlari va texnologik mutaxassislari ushbu hodisalar ortida kim turganini aniqlashga harakat qilmoqda, biroq xavfsizlik choralari yetarli bo'lmagani tanqid ostiga olinmoqda.
Shvetsiya milliy kiberxavfsizlik markazi rahbari Jon Billou dushanba kuni Reuters agentligiga bergan intervyusida markaz do'konlardagi sovutish tizimlariga ta'sir ko'rsatayotgan ko'plab insidentlarga javob qaytarayotganini tasdiqladi. Uning ta'kidlashicha, oxirgi haftalarda mamlakatda yangilanishi yoki xavfsizlik yamoqlari o'rnatilishi lozim bo'lgan juda ko'p ochiq operatsion texnologiya qurilmalari aniqlangan. Shvetsiyaning ICA va Coop kabi yirik savdo tarmoqlari vakillari o'zlarining do'konlarida muzlatgichlar harorati tunda birdaniga ko'tarilib ketganini ma'lum qilishdi.
Shuningdek, Irlandiyadagi uchinchi yirik SuperValu supermarketlar tarmog'i ham 223 ta do'konidan 13 tasida muayyan modeldagi sovutish tizimlari kiberinsidentdan jabr ko'rganini bildirdi. Belgiya va Lyuksemburgda esa Ahold Delhaize kompaniyasiga qarashli o'nlab do'konlarda harorat keskin oshgani qayd etildi. Sabcobel sovutish kompaniyasi rahbari Stefan Moelansning so'zlariga ko'ra, hujum natijasida jihozlarning bug'latgichlari majburiy ravishda muzdan tushirish rejimiga o'tkazib yuborilgan.
Estoniyada ham kamida bitta supermarketlar tarmog'i ushbu muammoga duch kelgani xabar qilindi. Kitman Coldtech texnologik ta'minot kompaniyasi bosh direktori Jann Mutso bu holat juda yangi ekanini va ertalab sodir bo'lganini ta'kidladi. Avvalroq Fransiya supermarketlarida ham shunday kiberhujumlar qayd etilib, muzlatgichlardagi harorat 50 darajagacha ko'tarilib ketgani, bu esa oziq-ovqat mahsulotlarining buzilishiga hamda bir nechta do'konlarda yong'in kelib chiqishiga sabab bo'lgani aytilmoqda.
Source: www.aljazeera.com