Britaniyadagi Palestine Action tashkilotiga taqlid qilgan holda Yevropa va Shimoliy Amerikada qurol-yarog‘ ishlab chiqaruvchi korxonalarga qarshi qaratilgan norozilik namoyishlari va to‘g‘ridan-to‘g‘ri harakatlar to‘lqini avj olib bormoqda. Bunday guruhlar an'anaviy lobbilashtirish va sud jarayonlaridan voz kechib, mudofaa sanoati obyektlarini egallab olish, ularning ishini to'xtatish yoki mulkka zarar yetkazish kabi radikal usullarni qo'llamoqda. Xususan, Italiya, Fransiya va Kanadada Isroil qurolsoz kompaniyalari bilan hamkorlik qiluvchi korxonalar bir necha bor faollarning nishoniga aylandi.

Italiyada Palestine Action Italy deb nomlanuvchi guruh Rimdagi Leonardo harbiy korxonasining bosh qarorgohini bo‘yoqlar bilan bulg‘ab, bir nechta obyektlarni egallab oldi. Shuningdek, Global Sumud Flotilla Italia faollari harbiy yuklarni tashiydigan konteyner kema harakatini to'xtatishga urinishdi. Fransiyada esa Stop Arming Israel France harakati a'zolari Safran Data Systems kompaniyasi bosh qarorgohiga kirish yo'llarini to'sib qo'yib, ish jarayonini vaqtincha falaj qildi. Faollarning ta'kidlashicha, ularning asosiy maqsadi harbiy ta'minot zanjirini izdan chiqarish va Isroilning harbiy mashinasiga zarba berishdan iborat.

Biroq, bunday harakatlar G'arb hukumatlarining keskin javobiga sabab bo'lmoqda. Britaniya rejimi Palestine Action guruhini terrorchilik tashkiloti deb e'lon qilgach, minglab fuqarolar hibsga olindi. AQSh rejimi ham ushbu tashkilotga nisbatan sanksiyalar joriy etib, uning moliyaviy platformalariga kirishni cheklab qo'ydi. Shunga qaramay, faollar ta'qiblar ularning harakatlari samara berayotganidan dalolat berishini ta'kidlab, bosimlarga qaramay o'z kurashlarini davom ettirishga tayyor ekanliklarini bildirishmoqda.

Source: www.aljazeera.com