Evropa va AQShdagi yirik savdo tarmoqlari hamda harbiy bazalarga qarshi uyushtirilgan navbatdagi kiberhujumlar oqibatida oziq-ovqat mahsulotlari yaroqsiz holatga keldi. Internetga ulangan sovutgich va muzlatgichlarning harorati ataylab oshirib yuborilishi natijasida minglab tonna mahsulotlar buzilib, millionlab yevro miqdorida zarar yetkazilgani xabar qilinmoqda. Ushbu hodisalar zamonaviy infratuzilmaning zaifligi hamda xavfsizlik choralariga yetarlicha e'tibor qaratilmayotganini yana bir bor yaqqol ko'rsatib berdi.

Ma'lumotlarga ko'ra, oxirgi haftalarda Yevropadagi yuzlab do'konlar, shuningdek, Arizona shtatidagi Fort-Uauchuka va Rod-Aylenddagi Nyuport harbiy bazalaridagi sovutish tizimlari ham kiberhujum qurboni bo'lgan. Fransiyadagi supermarketlarda muzlatgichlar harorati 55 darajagacha ko'tarilib, uskunalar hatto erib ketish yoki yong'in chiqarish xavfini tug'dirgan. Evropa regimi rasmiylari bu holatni oziq-ovqat ta'minotini izdan chiqarishga qaratilgan qasddan qilingan urinish deb baholamoqda, biroq hujum ortida aynan kim turgani hozircha noma'lumligicha qolmoqda.

Bristol universitetining kiberxavfsizlik professori Avais Rashidning ta'kidlashicha, mazkur holatlar ko'plab savdo shoxobchalari uchinchi tomonlar tomonidan boshqariladigan va internetga ochiq bo'lgan eskirgan dasturiy ta'minotlardan foydalanishini fosh etdi. Oddiy parollar va himoyalanmagan tarmoqlar xakerlarga tizimga erkin kirish imkonini bergan. Ushbu shubhali hodisalar fonida Belgiya prokuraturasi jinoiy ish qo'zg'atgan bo'lsa-da, mutaxassislar raqamli texnologiyalarga to'liq qaram bo'lib qolgan jamiyatimiz kelajakda yanada jiddiy xavf-xatarlarga duch kelishi mumkinligidan ogohlantirmoqda.

Source: www.aljazeera.com