Hindiston va Xitoy qo‘shinlari o‘rtasida Arunachal-Pradesh shtatidagi amaldagi chegara chizig‘ida yana bir bor qarama-qarshiliklar kuzatildi, bu esa ikki mamlakat o‘rtasidagi nozik munosabatlarni yanada taranglashtirmoqda. Hindiston-Tibet chegara politsiyasi bosh direktori Shatrujeet Kapurning ma’lum qilishicha, so‘nggi kunlarda Xitoy harbiylari bilan bir nechta hududlarda yuzaga kelgan to‘qnashuvlar hamon davom etmoqda. Uning so‘zlariga ko‘ra, Xitoy Xalq ozodlik armiyasi va Chegara mudofaasi polki investitsiyalar hamda modernizatsiya borasida sezilarli darajada ilgarilab ketgani sababli, ularga qarshi an’anaviy vositalar orqaliko‘rsatish qiyinlashgan.

Ikki yadroviy davlat o‘rtasidagi bahsli chegara tog‘li hudud bo‘ylab o‘tgan bo‘lib, amaldagi nazorat chizig‘i ko‘pincha xavfsizlik inqirozlarini keltirib chiqaradi. Xususan, 2020-yilda Galvan daryosi vodiysida sodir bo‘lgan qonli to‘qnashuvlardan keyin ham munosabatlar to‘liq tiklangani yo‘q. Arunachal-Pradesh bosh vaziri Pema Khandu chegara buzilishlari yangilik emasligini ta’kidlagan bo‘lsa-da, muxolifatdagi Kongress partiyasi hukumatni Xitoy harakatlarini oqlashda va mamlakat manfaatlarini yetarlicha himoya qilmaslikda ayblamoqda. Hindiston Tashqi ishlar vazirligi vakili Randhir Jaiswal bu kabi hodisalarni Xitoy kuchlarining patrul qilish yo‘nalishlarini o‘zgartirishi bilan izohlagan.

O‘z navbatida, Xitoy Tashqi ishlar vazirligi vakili Guo Jiakun bu da’volarni rad etib, Xitoy qo‘shinlari odatiy patrul ishlarini olib borayotgani va ikki tomonlama kelishuvlarga qat’iy rioya qilayotganini ta’kidladi. Mutaxassislarning fikricha, chegaraning aniq demarkatsiya qilinmagani va Xitoyning Makmaxon chizig‘ini tan olmasligi doimiy taranglik manbai bo‘lib qolmoqda. Shuningdek, tomonlar o‘rtasida munosabatlarni barqarorlashtirish bo‘yicha diplomatik urinishlar olib borilayotganiga qaramay, hal etilmagan chegara muammosi ikki davlat o‘rtasidagi ishonchsizlikni saqlab qolmoqda.

Source: www.dw.com