Apple korporatsiyasi o'zining ilk uy robotini 2027-yilda taxminan 1 ming dollar narxda chiqarishni rejalashtirayotgani xabar qilinmoqda. The Information nashrining ma'lumotlariga ko'ra, 9 dyuymli ekranga ega bo'lgan mazkur qurilma HomeView aqlli displeyining yanada takomillashtirilgan versiyasi bo'lishi kutilmoqda.

Ta'kidlanishicha, Amerika texnologiya giganti ushbu qurilmani HomeView Ultra yoki HomeView Max deb nomlashni ko'rib chiqmoqda. Dastlabki prototiplar aylanuvchi kronşteynga o'rnatilgan 9 dyuymli displey bilan jihozlangan bo'lib, uning tashqi ko'rinishi afsonaviy iMac G4 kompyuterini eslatadi. Ushbu dizayn o'zining g'ayrioddiy tuzilishi va Pixar animatsion studiyasining mashhur logotipiga o'xshashligi sababli mutaxassislar tomonidan e'tirof etilmoqda.

Yangi gadjet xonadagi muhit bilan mustaqil ravishda ishlashga mo'ljallangan bo'lib, turli xil kamera hamda datchiklar bilan ta'minlanadi. Xususan, u uy egasi xonaga kirib kelganda yoritish moslamalarini avtomatik ravishda yoqish yoki uy hayvonlarini stol ustidan haydab chiqarish kabi funksiyalarni bajarishi kutilmoqda. Shuningdek, dasturchilar robotni atrof-muhitdagi buyumlarga urilib ketmasligi uchun yetarlicha aqlli qilish ustida ish olib borayotgani aytilmoqda.

Biroq, loyihaning amalga oshirilishida ichki muammolar va jamoadagi kelishmovchiliklar ham mavjudligi taxmin qilinmoqda. Mutaxassislarning fikricha, apparat bazasi allaqachon tayyor bo'lishiga qaramay, qaysi funksiyalarni birinchi versiyaga kiritish kerakligi borasidagi bahslar reliz muddatining cho'zilishiga olib kelmoqda. Natijada, chiqarilish sanasi 2028-yilga ham surilib ketishi ehtimoldan xoli emas.

Shu bilan birga, Apple ilgari boshqa robototexnika konsepsiyalarini ham o'rganib chiqqan, ular orasida g'ildirakli yordamchi qurilmalar, uy sharoiti uchun mo'ljallangan uchuvchi dronlar hamda kiyimlarni saralovchi manipulyatorlar bo'lgan. Hozircha ushbu muqobil ishlanmalarning taqdiri haqida aniq ma'lumotlar mavjud emas.

Source: kun.uz