Seshanba kuni oraliq saylovlarda demokratlar Vakillar palatasi va Senat ustidan to'liq nazorat o'rnatgani haqidagi xabarlar ortidan AQSh fond bozorlarida o'sish tendentsiyasi kuzatilmoqda. Chorshanba kuni soat 9:30 da savdolar ochilishida Nasdaq indeksi 1 foizga, Dow Jones Industrial Average 1,8 foizga va S&P 500 1,1 foizga yuqoriga ko'tarildi. Importga tayanadigan Walmart va Target kabi yirik chakana savdo tarmoqlari tarif siyosatidagi ehtimoliy o'zgarishlar fonida mos ravishda 1,3 va 3,3 foizga qimmatlashdi.

Shu bilan birga, sog'liqni saqlash sektori aralash natijalarni ko'rsatmoqda: UnitedHealthcare aksiyalari 2,9 foizga, CVS Health esa 12 foizga tushib ketgan bo'lsa-da, Cigna 1,6 foizga o'sdi. Siyosiy noaniqlikni kamaytirishga qaratilgan AQSh rejimi rahbari Donald Trampning saylov natijalarini tan olishini bildirgan ijtimoiy tarmoqdagi xabari investorlarning kayfiyatini go'yo ijobiy tomonga o'zgartirgani da'vo qilinmoqda.

Sun'iy intellekt (SI) va texnologiya sektoriga ixtisoslashgan kompaniyalar uchun esa istiqbollar unchalik ravshan emas, chunki demokratlar bu sohaga nisbatan qattiqqo'l pozitsiyada ekani aytiladi. Oracle va Nvidia aksiyalari savdolar boshida pastga tushdi, Alphabet esa 3,5 foizlik o'sishni qayd etdi. Yorkville Ives boshqaruvchi hamkori Den Ayvsning ta'kidlashicha, demokratlarning Kongressdagi ustunligi kelgusi ikki yil ichida texnologik qonunchilikka jiddiy to'siqlar tug'diradi va hatto ma'lumotlar markazlarining 10 foizi qurilmasligi mumkin.

Neft bozorida ham pasayish kuzatilmoqda. Brent markali neft fyucherslari 3,20 dollarga yoki 3,09 foizga arzonlashib, bir barrel uchun 100,40 dollarni tashkil etdi. Investorlar saylov natijalari bilan bir qatorda, Eron hamda Rossiya va Ukraina o'rtasidagi mojarolarni hal qilish bo'yicha ehtimoliy muzokaralarni diqqat bilan kuzatib bormoqda.

Source: www.aljazeera.com