Yevro-O‘rtaer dengizi inson huquqlari monitoriyi tarqatgan ma'lumotlarga ko‘ra, Isroil rejimi G‘azodagi qo‘l-oyog‘i kesilgan bolalarning chet elga chiqib davolanishini cheklab qo‘ygan. Tashkilotning ta'kidlashicha, sayohatga qo‘yilgan cheklovlar tibbiy evakuatsiyalarni ham o‘z ichiga olib, yuzlab bolalarning ixtisoslashgan yordam olishiga to‘sqinlik qilmoqda.

Hisobotda aytilishicha, Isroil hujumlari oqibatida G‘azoda 1 134 nafar bola oyoq-qo‘lidan ayrilgan, biroq ularning oz qismigina zarur uzoq muddatli tibbiy yordam bilan ta'minlanmoqda. Jahon sog‘liqni saqlash tashkiloti ma'lumotlariga ko‘ra, 2024-yil sentyabridan 2026-yil mayigacha bo‘lgan davrda 2300 nafar nogironligi bo‘lgan shaxs davolanish uchun ko‘rikdan o‘tgan, biroq ularning atigi 500 nafari doimiy protezlar olgan xolos.

Hududda protez-ortopediya yo‘nalishida atigi sakkiz nafar sertifikatlangan mutaxassis mavjud bo‘lib, bu o‘ta og‘ir vaziyatni keltirib chiqarmoqda. Jenevada joylashgan tashkilotning xabar berishicha, anklavda sun'iy tana a'zolarini ishlab chiqarish, o‘rnatish, ularga texnik xizmat ko‘rsatish va moslashtirish uchun yetarli darajada uskunalar mavjud emas.

Huquq himoyachilarining ogohlantirishicha, davolanish, reabilitatsiya va tegishli ta'lim olish imkoniyatining doimiy ravishda rad etilishi bolalar duch kelayotgan zararni umrbod mahrumlikka aylantirib yuborishi mumkin. Mutaxassislar tibbiy nazoratdagi uzilishlar bolalarning o‘sish jarayonida protezlarni o‘z vaqtida o‘zgartirmaslik qo‘shimcha asoratlar, surunkali og‘riqlar va harakatlanishning qiyinlashishiga olib kelishini ta'kidlashmoqda.

Shuningdek, mazkur tashkilot Isroil rejimini urush jinoyatlarida ayblab, tibbiy jihozlarni olib kirishga to‘sqinlik qilayotganini da'vo qilmoqda. Isroil tomoni blokada qilingan hududga protez ishlab chiqarish uchun zarur bo‘lgan uskunalar va mutaxassislarni kiritmayotgani aytilmoqda.

Source: www.aljazeera.com