Gretsiya rasmiylari va qirg‘oqni qo‘riqlash xizmati xodimlarining so‘nggi ma'lumotlariga ko‘ra, mamlakatga yetib olishga intilgan kamida 21 nafar muhojir va qochqin halok bo‘lgan. Fojia Gretsiyaning Krit oroli janubidagi dengiz akvatoriyasida sodir bo‘lgan bo‘lib, bu hudud so‘nggi yillarda Yevropaga o‘tishga intilayotganlar uchun asosiy markazlardan biriga aylangan.
Asosiy faktlar: Dushanba kuni tongda Gretsiya qirg‘oqni qo‘riqlash xizmati 12 ta jasadni topdi va konteyner kemasi tomonidan aniqlangan qayiqdan 18 kishini qutqardi, keyinchalik shifoxonada yana bir kishi vafot etdi. Shanba kuni sodir bo‘lgan boshqa bir hodisada esa yana 8 kishining jasadi topilib, 28 kishi qutqarib qolindi, ikki kishi bedarak yo‘qolgan deb hisoblanmoqda.
Ushbu og‘ir fojianing sabablari hozircha to‘liq o‘rganilmoqda, biroq Gretsiya rasmiylari qayiqlar kuchli shamol va noqulay ob-havo sharoiti tufayli dengizda bir necha kun davomida qolib ketgan bo‘lishi mumkinligini taxmin qilmoqda. Yevropa chegaralarni boshqarish agentligi — Frontex tomonidan berilgan xabarlarga ko‘ra, qutqaruv operatsiyalarida samolyotlar va uchuvchisiz ucish apparatlari ham faol ishlatilgan.
Yevropa rejimining Frontex agentligi joriy yilda blok hududiga noqonuniy chegara kesib o‘tish holatlari kamayganini da'vo qilmoqda. Rasmiy ma'lumotlarga ko‘ra, 2026-yilning dastlabki uch choragida taxminan 31,8 mingta kesib o‘tish holati qayd etilgan bo‘lib, bu o‘tgan yilning mos davriga nisbatan 15 foizga kamayganini ko‘rsatadi.
Shunga qaramay, Krit oroli Yaqin Sharq, Afrika va Osiyodagi mojara hamda qashshoqlikdan qochayotgan minglab insonlar uchun Yevropa Ittifoqiga kirishning asosiy nuqtalaridan biri bo‘lib qolmoqda va bu yo‘nalishdagi xavflar hamon yuqori darajada saqlanib turibdi.
Source: www.aljazeera.com