Prezident Shavkat Mirziyoyev raisligidagi yig‘ilishda uyushma rahbariyati faoliyati yangi tashabbuslar yo‘qligi va sohadagi qoniqarsiz ko‘rsatkichlar uchun tanqid qilindi.

Iqtisodiy o‘sish sur’atlarini oshirishga bag‘ishlangan majlisda "Uzcharmsanoat" rahbariyati soha rivojiga yangi yondashuvlar kiritmaganligi va joylarda samarali ish olib bormaganligi ta’kidlandi. Shu sababli, uyushma raisi Akbar Sultonovni lavozimidan ozod etish buyurildi.

Qayd etilishicha, 972 ta poyabzal ishlab chiqarish korxonalaridan 378 tasi faoliyatini to‘xtatgan, yana 120 tasi o‘z quvvatlarining yarmidan kamini ishlatmoqda. Kalip, bog‘ich va aksessuarlar kabi yo‘nalishlarda importga bog‘liqlik saqlanib qolmoqda.

Natijada, o‘tgan yil yakunlarida e’lon qilingan 250 million dollarlik eksportning 40 foizigina ta’minlangan. Joriy yil uchun ishlab chiqarish va eksport rejasi ham qoniqarsiz deb topildi.

Akbar Sultonov 2024-yil noyabr oyida uyushma raisi etib tayinlangan edi.

Source: kun.uz