KXDR yetakchisi Kim Chen In Koreya Xalq armiyasi rota komandirlarining uchinchi yig‘ilishida nutq so‘zlab, harbiy qismlarning jangovar tayyorgarligini kuchaytirish hamda mumkin bo‘lgan urushga to‘liq tayyor turish zarurligini ta’kidladi. Bu haqda Koreya markaziy telegraf agentligi xabar tarqatdi.

Kim Chen Inning ma’lum qilishicha, komandirlarning asosiy vazifasi doimiy va shiddatli mashg‘ulotlar orqali bo‘linmalarning yuqori jangovar shayligini saqlab qolishdan iborat. Shuningdek, u harbiy xizmatchilarning vatanparvarlik ruhini va mafkuraviy barqarorligini mustahkamlashga chaqirdi.

Shimoliy Koreya hukumati rahbarining ta’kidlashicha, qurolli kuchlarning jangovar qobiliyati faqat zamonaviy qurol-yarog‘ va texnikaga emas, balki shaxsiy tarkibning tayyorgarligiga ham bog‘liq. Mazkur tadbirda mamlakat mudofaa vaziri Kim Son Gi va Bosh shtab boshlig‘i Ri Yon Gil ham ishtirok etdi.

Eslatib o‘tamiz, bu voqeadan biroz oldin KXDR Yapon dengizida suv osti kemasidan strategik qanotli raketalarni sinovdan o‘tkazgani xabar qilingan edi. Shuningdek, MAGATE Yongbyon yadro majmuasida yangi obyekt qurilishi borligini ma’lum qilgan.

Source: podrobno.uz