Hindiston poytaxti Nyu-Dehli shahrida minglab norozilik namoyishchilari saylov ro‘yxatlaridagi bahsli o‘zgarishlarga qarshi chiqib, bosh saylov komissari iste'fosini talab qilishdi. Muxolifat kuchlari amaldagi bosh vazir Narendra Modi hukumatini saylov jarayonlariga aralashish va o‘z manfaatlariga xizmat qildirishda ayblamoqda.

Yakshanba kungi yirik namoyishga “Hindiston milliy kongressi” partiyasi yetakchisi Rahul Gandi boshchilik qildi. Ushbu namoyish saylov okruglarini qayta ko‘rib chiqish va bosh saylov komissari Gyanesh Kumar faoliyatiga qarshi bir oydan ortiq davom etayotgan noroziliklarning mantiqiy davomi bo‘ldi. Muxolifat vakillarining ta'kidlashicha, saylov ro‘yxatlaridan 130 milliondan ortiq fuqaroning o‘chirilib yuborilishi asosan musulmonlar hamda boshqa ozchilik guruhlarga qattiq ta'sir ko‘rsatgan.

O‘z navbatida, Saylov komissiyasi barcha ayblovlarni qat'iyan rad etib, hech bir siyosiy kuchga yon bosmaganini va ro‘yxatdan asossiz chiqarib yuborilgan fuqarolar qaytadan ro‘yxatdan o‘tishlari mumkinligini bildirdi. Bosh vazir partiyasi esa muxolifatning bu harakatlarini qonuniy tartib-qoidalarni obro‘sizlantirish hamda davlatdagi barqarorlikka putur yetkazish deb baholamoqda.

Huquq-tartibot idoralari poytaxtda xavfsizlik choralarini kuchaytirib, yirik yo‘llarni yopishdi va minglab politsiya xodimlarini jalb qilishdi. Shunga qaramay, namoyishchilar o‘z noroziliklarini davom ettirib, hukumat siyosatiga qarshi keskin shiorlar aytishdi. Tahlilchilar ushbu chuqurlashib borayotgan siyosiy inqirozni Modi hukumati 2014 yilda hokimiyatga kelganidan beri duch kelgan eng jiddiy sinovlardan biri sifatida baholamoqda.

Source: www.aljazeera.com