Germaniya, Avstriya va Vengriyada o'tkazilgan Xellouin bayrami paytida bolalarga tarqatilgan shirinliklar ichidan ignalar va boshqa o'tkir metall buyumlar topilgani jamoatchilikni tashvishga soldi. Huquq-tartibot idoralari ota-onalarni farzandlari to'plagan shirinliklarni jiddiy tekshirib chiqishga chaqirmoqda.

Germaniyaning janubi-sharqiy Bavariyadan tortib shimoliy Quyi Saksoniyagacha bo'lgan bir nechta hududlarida shunday xavfli holatlar qayd etilgan. Xususan, Gamburg yaqinidagi Bremervorde shahrida to'qqiz yoshli qizaloq shokolad iste'mol qilish chog'ida tilini jarohatlab olgan va uning ichidan uzunligi 5 santimetr keladigan pin topilgan.

Vengriyada ham Budapesht yaqinidagi Gyomro shaharchasida bolalarga tarqatilgan shirinliklar ichidan mixlar, buruslar va sim bo'laklari chiqqani sababli jinoiy ish qo'zg'atildi. Mahalliy hokimiyat ma'lumotlariga ko'ra, qizaloqlardan biriga mix solingan tofi konfeti berilgan bo'lib, u baxtga qarshi buni o'z vaqtida payqab qolgan va yutib yubormagan.

Shuningdek, Avstriyaning to'rtta shtatida ham shunga o'xshash xavfli holatlar yuzasidan tekshiruvlar boshlangan. Linz yaqinidagi Amstetten hududida o'n yoshli qizaloq kichik shokoladni tishlab olgach, og'zidan yengil jarohat olgani ma'lum qilindi. Avstriya rasmiylari bu qilmishlarni qattiq qoralab, aybdorlar qonun oldida to'liq javob berishini ta'kidlamoqda.

Bavariya politsiyasi bu kabi holatlar o'tgan yillarda ham kuzatilganini, biroq joriy yilda qayd etilgan qoidabuzarliklar keskin oshganini ma'lum qildi. Ayrim hududlarda soxta xabarlar va taqlid qilish holatlari ham aniqlangan bo'lib, politsiya barcha ota-onalarni o'ta hushyor bo'lishga chaqirmoqda.

Source: www.bbc.co.uk