Tolibon hukumati tomonidan ayollarning sport bilan shug‘ullanishiga qo‘yilgan qat’iy cheklovlarga qaramay, afg‘on velosipedchisi Fariba Hoshimi Yaponiyaning Nagoya shahri yaqinida bo‘lib o‘tgan Osiyo o‘yinlarida ayollar o‘rtasidagi shosse poygasida kumush medalni qo‘lga kiritdi. Italiyada istiqomat qiluvchi 23 yoshli sportchi bu g‘alabani “o‘ziga xos” deb atadi.
“Hozir his-tuyg‘ularimni tushuntirib bera olmayman”, — dedi u va o‘smirlik chog‘ida sport bilan shug‘ullana boshlaganida toshlar bilan hujumga uchragani va erkak qiyofasida mashq qilgani haqida gapirdi. Uning singlisi Yulduz ham hozirda professional velosipedchi hisoblanadi. “Men ayollar orzu qilgani uchun hujumga uchraydigan mamlakatda tug‘ilganman va bu bilan kurashganimdan juda xursandman”, — deya qo‘shimcha qildi u. “Umid qilamanki, keyingi avlod bu yerga kelib, o‘z mamlakatini hech qanday qo‘rquvsiz himoya qiladi”.
Tolibon hukumati 2021-yilda hokimiyatga qaytganidan so‘in ayollarning ta’lim olishi va jamoat hayotidagi ishtirokini, shu jumladan sportni ham cheklovchi bir qator qoidalarni joriy etdi. “Ular bizning erkinligimizni, hamma narsamizni tortib oldilar”, — dedi Afg‘onistonning shimolidagi Foryob viloyatidan bo‘lgan va Tolibon hokimiyatni egallaganidan keyin mamlakatni tark etgan Hoshimi. “Bu kumush medal afg‘on ayollarining qanchalik matonatli ekanligini ko‘rsatadi va men juda xursandman. Men yolg‘iz emasman; bilamanki, orqamda millionlab ayollar, ko‘plab mamlakatlardan, xuddi shunday orzular bilan men bilan birga turishadi”.
Italiyalik sobiq jahon chempioni Alessandra Kapellotto yordamida Afg‘onistondan qochib ketgan Hoshimi Italiyaga ko‘chib o‘tdi va hozir o‘sha yerda yashab, mashg‘ulotlar olib boradi. U va singlisi ikki yil avval Parij Olimpiadasida qatnashgan edi, endi esa 2028-yilgi Los-Anjeles O‘yinlari ko‘rinib turibdi. “Men hech qachon taslim bo‘lishni xohlamayman va umid qilamanki, Los-Anjelesda yana nimalar bo‘lishini ko‘ramiz”, — dedi u.
Hoshimi kumush medali uchun Yaponiya terma jamoasiga alohida minnatdorchilik bildirdi. “Men bu yerga mexaniksiz, hech qanday tayyorgarliksiz keldim. Milliy federatsiyadan biz bilan bir kishi kelgan, u faqat mashinani boshqargan”, — dedi u. “Velosipedni o‘zimiz ta’mirladik. Men o‘zimga mexanik bo‘ldim. Velosipedni o‘zim yuvdim. Yaponiya terma jamoasiga rahmat. Ular menga juda yaxshi munosabatda bo‘lishdi va velosipedimni ta’mirlashdi”.
Source: www.aljazeera.com