Qozog‘iston Prezidenti Qosim-Jomart Toqayev 25-sentabrni Kaspiy dengizida bo‘lib o‘tgan harbiy mashg‘ulotlar chog‘ida halok bo‘lgan harbiy xizmatchilar uchun umummilliy motam kuni deb e’lon qildi. Bu haqda Podrobno.uz xabar bermoqda.

Fojia 24-sentabr kuni “Hazar qorg‘any-2026” nomli Harbiy-dengiz kuchlari mashg‘ulotlari davomida Qozog‘istonning Kaspiy dengizidagi sektorida yuz berdi. Ob-havoning keskin yomonlashishi va kuchli shamol tufayli o‘quv-jang vazifasini bajarayotgan bir guruh harbiy xizmatchilar dengizga olib ketilgan. Jami 19 kishi suvga tushib qolgan, ulardan uchtasini qutqarishga muvaffaq bo‘lingan, qolganlarini qidirish ishlari davom etmoqda. Hozirgi vaqtda rasmiylar to‘qqiz kishi halok bo‘lganini ma’lum qilgan, biroq OAV suvdan 12 kishining jasadi chiqarilgani haqida xabar bermoqda.

Prezident Toqayev halok bo‘lganlarning yaqinlariga ta’ziya bildirdi va hukumat komissiyasiga ularga yordam ko‘rsatish uchun barcha zarur choralarni ko‘rishni topshirdi. Odamlar o‘limi yuzasidan jinoyat ishi qo‘zg‘atildi, voqea holatlarini aniqlash uchun Mang‘istau viloyatiga Mudofaa vazirligi komissiyasi yetib keldi, unga vazir Dauran Kosanov boshchilik qilmoqda.

Avvalroq sinoptiklar mintaqada shamol tezligi sekundiga 20 metrgacha yetishi mumkinligini prognoz qilgan edi. Qozog‘iston Qurolli Kuchlari Harbiy-dengiz kuchlari bosh qo‘mondoni Kanat Niyazbekov rahbarligidagi manevrlarda 500 dan ortiq kishi qatnashgan.

Hozircha qutqaruv ishlari davom etmoqda, rasmiylar halok bo‘lganlar soni yana oshishi mumkinligini istisno qilmayapti. Voqea Qozog‘iston jamoatchiligida katta rezonans keltirib chiqardi, harbiy mashg‘ulotlar xavfsizligi masalasi yuzasidan savollar tug‘ilmoqda.

Source: podrobno.uz