Kabo-Verde rasmiylari Atlantika okeanidagi kruiz kemasida noyob respirator virus – hantavirus tarqalishi gumon qilinayotgani sababli kemani portlariga qo‘yishga ruxsat bermasliklarini ma’lum qildi. Bu qaror kemada uch yo‘lovchi vafot etganidan keyin qabul qilindi.
Hantavirus kasalligi, asosan, kemiruvchilar orqali yuqadi. Gumon qilinishicha, virus uch kishining, jumladan, Gollandiyalik er-xotinning o‘limiga sabab bo‘lgan, kamida ikki kishini kasal qilgan va 69 yoshli britaniyalik sayyohni Janubiy Afrikadagi reanimatsiya bo‘limiga yotqizilishiga olib kelgan.
Kabo-Verde sog‘liqni saqlash idoralari kemani kuzatib borayotganliklarini va “milliy sog‘liqni saqlashni himoya qilish maqsadida” uning qo‘nishiga ruxsat bermasliklarini bildirdi. Ular Gollandiya va Buyuk Britaniya rasmiylari bilan aloqada ekanliklarini, shuningdek, havo orqali tibbiy evakuatsiya qilish imkoniyatini ko‘rib chiqayotganliklarini qo‘shimcha qildi.
MV Hondius kemasi uch hafta oldin Argentinadan jo‘nab, Atlantika okeani bo‘ylab bir necha to‘xtashlarni amalga oshirgan edi. Jahon sog‘liqni saqlash tashkiloti (JSST) yakshanba kuni kemada “sog‘liqni saqlash hodisasi” yuz berganini e’lon qildi.
JSST ma’lumotlariga ko‘ra, hozirgacha bir holat laboratoriya tomonidan tasdiqlangan va beshta gumon qilinayotgan holat mavjud. Olti kishidan uchtasi vafot etgan, biri esa Janubiy Afrikada reanimatsiyada. Yevropadagi bir rasmiyning so‘zlariga ko‘ra, keng jamoatchilik uchun xavf pastligicha qolmoqda.
Janubiy Afrika sog‘liqni saqlash departamenti ikki qurbon gollandiyalik er-xotin ekanligini tasdiqladi. 70 yoshli erkak kemada isitma, bosh og‘rig‘i va qorin og‘rig‘idan so‘ng vafot etgan. Uning rafiqasi 69 yoshda, Gollandiyaga qaytishga urinayotganda aeroportda yiqilib, kasalxonada vafot etdi.
Kruiz kompaniyasi Oceanwide Expeditions kemada ikki ekipaj a’zosi shoshilinch tibbiy yordamga muhtoj ekanligini ma’lum qildi. Ular Kabo-Verde rasmiylarining tibbiy yordamga muhtoj yo‘lovchilarni tushirishga ruxsat berishini kutmoqda. Gollandiya tashqi ishlar vazirligi ikki gollandiyalikning o‘limini tasdiqladi.
Hantavirus infektsiyalari odatda kasal kemiruvchilarning siydigi yoki najasi orqali yuqadi va og‘ir nafas olish kasalliklariga olib kelishi mumkin. JSST ma’lumotlariga ko‘ra, virus kamdan-kam hollarda odamdan odamga yuqishi mumkin. O‘tgan yili aktyor Gen Xekmanning rafiqasi Betsi Arakava Nyu-Meksikoda hantavirusdan vafot etgan edi.
Source: www.theguardian.com