Hindiston Bosh vaziri Narendra Modi boshchiligidagi hindu millatchi BJP partiyasi bir necha shtatlardagi saylovlarda muvaffaqiyat qozonmoqda. Ayniqsa, G‘arbiy Bengaliyada partiya ilk bor hokimiyatga kelish arafasida. Saylov komissiyasining dastlabki maʼlumotlariga ko‘ra, BJP 294 oʻrinli shtat qonunchilik palatasida kamida 190 oʻrinda yetakchilik qilmoqda. Bu esa 2011-yildan beri hokimiyatda bo‘lgan Mamata Banerji boshchiligidagi Trinamul Kongressining mag‘lubiyatga uchrashidan dalolat beradi.
Tamil Nadu shtatida esa mashhur kino aktyori Jozef Vijay ikki yil oldin asos solgan Tamilaga Vettri Kazhagam (TVK) partiyasi kutilmagan natija ko‘rsatmoqda. Dastlabki maʼlumotlarga ko‘ra, TVK 234 oʻrindan 62 tasida g‘alaba qozongan, yana 45 ta oʻrinda yetakchilik qilmoqda. Bu Vijayning hokimiyatdagi DMK partiyasini siqib chiqarishiga olib kelishi mumkin. Ekspertlarning fikricha, Vijayning muvaffaqiyati uning yosh saylovchilar orasidagi mashhurligi va muxlislar klublarining siyosiy kadrlarga aylanishi bilan bog‘liq.
Kerala shtatida Kongress partiyasi yetakchiligidagi Birlashgan Demokratik Front (UDF) kommunistik hukumatni mag‘lub etib, tarixiy g‘alabaga erishmoqda. Saylov komissiyasi maʼlumotlariga ko‘ra, UDF 140 oʻrindan 94 tasida yetakchilik qilmoqda. Kongress partiyasi deputati Shashi Tarur bu natijani “tarixiy” deb atadi va “Bu Hindiston demokratik siyosiy tarixida katta bobning yopilishi” dedi.
Assam shtatida BJP uchinchi muddatga hokimiyatni saqlab qolish arafasida. Bosh vazir Himanta Bisva Sarma ikkinchi muddatga qaytishi kutilmoqda. Puducherri ittifoq hududida esa BJP qo‘llab-quvvatlagan alyans hokimiyatni saqlab qolishi mumkin.
Saylov kampaniyasi davomida G‘arbiy Bengaliyada millionlab saylovchilarning ro‘yxatdan o‘chirilishi bahs-munozaralarga sabab bo‘ldi. Tanqidchilarning taʼkidlashicha, bu harakat asosan marginal va ozchilik jamoalariga taʼsir qilgan. Mamata Banerji saylov komissiyasini tarafkashlikda ayblab, ovozlarni soxtalashtirishga urinishlar borligini daʼvo qildi.
Hindiston Mudofaa vaziri Rajnat Singx “Sindur” operatsiyasini texnologik urush namunasi sifatida baholadi. U Hindiston qurolli kuchlarining o‘zgaruvchan sharoitlarga tayyorligini maqtadi. Operatsiya 2025-yil may oyida Kashmirning Pahalgam shahridagi teraktga javoban boshlangan edi.
Ranvir Allohbodiya (BeerBiceps) “Indiaʼs Got Latent” mojarosi haqida hujjatli film ustida ishlayotganini eʼlon qildi. 2025-yil boshida uning shoudagi bir savoli keng tanqidga sabab bo‘lgan edi.
Uttar-Pradesh shtatida tez yurgan mashina ikki mototsikl to‘qnashuvi qurbonlariga yordam berayotgan olomonni urib yubordi. Natijada kamida 8 kishi halok bo‘ldi. Hindistonda yo‘l-transport hodisalari tez-tez sodir bo‘lib, sabab sifatida yo‘llarning yomon ahvoli va ehtiyotsiz haydash ko‘rsatiladi.
Source: www.dw.com