Hindiston Bosh vaziri Narendra Modi mamlakat fuqarolarini yoqilg‘i sarfini qisqartirish, keraksiz xorijiy sayohatlardan voz kechish va iloji bo‘lsa, masofaviy ish formatiga qaytishga chaqirdi. Uning so‘zlariga ko‘ra, bunday choralar jahon energetika narxlari oshishi sharoitida valyuta zaxiralariga bosimni kamaytirishga yordam beradi.
Bunday noodatiy chaqiriqlarga sabab Yaqin Sharqdagi keskinlikning kuchayishi bo‘ldi. Eron atrofidagi vaziyatning yomonlashuvi Fors ko‘rfazi mamlakatlaridan jahon bozoriga neft va suyultirilgan gaz yetkazib berishning asosiy yo‘nalishi bo‘lgan Hormuz bo‘g‘ozining amalda bloklanishiga olib keldi. Natijada ko‘plab mamlakatlarda yoqilg‘i va sanoat mahsulotlari narxi keskin oshdi. Aynan shu vaziyatni Modi Haydaroboddagi mitingda o‘z chaqiriqlarining asosiy sababi deb atadi.
Murojaatida Modi Hindiston xorijiy valyutani tejashga alohida e’tibor qaratishi kerakligini ta’kidladi. Shu munosabat bilan u COVID-19 pandemiyasi davrida keng tarqalgan onlayn uchrashuvlar va uydan ishlash amaliyotidan faolroq foydalanishni taklif qildi.
Shuningdek, Hindiston hukumati rahbari fuqarolarni jamoat transportidan, jumladan metrodan tez-tez foydalanishga, iloji bo‘lsa, bir mashinada birgalikda yurishga chaqirdi.
Modi import masalasiga ham to‘xtaldi. U mamlakat aholisiga to‘ylarda an’anaviy ravishda katta mablag‘ sarflanadigan oltin xarididan vaqtincha voz kechishni, shuningdek, kamida bir yil davomida keraksiz xorijiy sayohatlarni qisqartirishni tavsiya qildi.
Bosh vazir, shuningdek, oilalarga o‘simlik yog‘i iste’molini kamaytirishni maslahat berib, buni nafaqat sog‘liq uchun foydali, balki “vatanparvarlik qadami” deb atadi. Fermerlarga esa o‘g‘itlardan foydalanishni deyarli ikki baravar kamaytirishni taklif qildi.
Avvalroq BMTning Oziq-ovqat va qishloq xo‘jaligi tashkiloti (FAO) ekspertlari qishloq xo‘jaligi uchun muhim resurslarga ega kemalar Hormuz bo‘g‘ozi orqali harakatni imkon qadar tezroq tiklashi kerakligini, aks holda dunyo oziq-ovqat narxlarining keskin o‘sishi va COVID-19 pandemiyasiga o‘xshash inqirozli oqibatlarga duch kelishi mumkinligini ma’lum qilgan edi.
Source: podrobno.uz