Filippin va Indoneziya seysmologiya xizmatlari Mindanao oroli yaqinida 7,8 magnitudali kuchli zilzila sodir bo‘lganidan so‘ng tsunami xavfi haqida ogohlantirish berdi.

AQSh Geologik xizmati ma’lumotlariga ko‘ra, zilzila epitsentri Filippinning Burias shahridan 24,7 kilometr g‘arbiy-janubiy-g‘arbda, 35 kilometr chuqurlikda joylashgan.

Filippin vulqon va seysmologiya instituti (Phivolcs) bir metrdan ortiq to‘lqinlar bir necha soat davom etishi mumkinligi haqida ogohlantirdi. Indoneziya seysmologiya agentligi ham o‘z hududlari uchun tsunami xavfini e’lon qildi.

Tinch okeani tsunami ogohlantirish markazi Palau, Tayvan va Papua-Yangi Gvineya uchun ham xavf borligini ma’lum qildi.

Filippin Tinch okeanining “olov halqasi” deb ataladigan seysmik yoy zonasida joylashgan bo‘lib, bu hudud vulqonlar, zilzilalar va tsunamilar tez-tez sodir bo‘lishi bilan ajralib turadi.

Source: www.dw.com