Oq uy ko‘plab ekologik qoidalarni bekor qilayotgan bir paytda, ba’zi masihiy yetakchilar o‘z jamoatlarini Muqaddas Kitobda aytilganidek, erni asrashga chaqirmoqda.

AQShda masihiylar soni yillar davomida kamayganidan keyin barqarorlashgan bo‘lsa-da, yakshanba kuni cherkovga kelganlarning faqat bir qismi iqlim o‘zgarishi haqida eshitadi. 2025-yilgi tadqiqotga ko‘ra, AQShdagi barcha asosiy konfessiyalarning masihiy ruhoniylarining 90% ga yaqini odam sabab bo‘lgan iqlim o‘zgarishiga ishonsa-da, faqat yarmi bu haqda jamoat bilan gaplashgan.

Arizona universiteti professori Stiliano Siroopoulos bu tafovutni bir qancha omillar bilan izohlaydi: “Ular bu haqda qayg‘urgani bilan, gapirishga majbur emaslar. Ba’zi ruhoniylar o‘zlarini bu mavzuda yetarli bilimga ega emas deb hisoblashadi yoki bu ularning vazifasi emas deb o‘ylashadi. AQShda iqlim o‘zgarishi juda siyosiylashgan masala.”

Pensilvaniyadagi Hope Episcopal cherkovi ruhoniysi Bredli Matsonn fikricha, iqlim bo‘yicha bo‘lingan qarashlar jim turish uchun emas, balki gapirish uchun sababdir. U “Ikkinchi kelish kapitalizmi” deb atagan g‘oyani tanqid qiladi: “Ba’zilar iste’molni cheklab bo‘lmaydi, chunki Xudo qaytib kelib, erni yo‘q qilib, yangisini yaratadi, deb o‘ylashadi.”

Matsonn bu talqin Ibtido kitobining noto‘g‘ri o‘qilishidan kelib chiqqanini aytadi. Uning cherkovi iqlim targ‘iboti, o‘rmonlarni qayta tiklash va Chesapeake ko‘rfazi suv havzasini himoya qilish bilan shug‘ullanadi. Merilend shtatidagi Sent-Nikolas Lyuteran cherkovi ruhoniysi Ken Teylor esa o‘z va’zlarida ekologiya mavzusini ko‘targanida qarshilikka uchragan.

“Iqlimga bag‘ishlangan bir qator yakshanbalardan so‘ng, ba’zi odamlar ‘nega minbarga siyosatni aralashtiryapsiz?’ deb so‘rashdi. Ba’zilar hatto cherkovni tark etishdi”, deydi Teylor. Shunga qaramay, u jamoatni mahalliy o‘simliklar ekish, suv dispenserlari o‘rnatish va toza suvni himoya qilish kabi harakatlarga jalb qilishda davom etmoqda.

Matsonn va Teylor iqlim haqida va’z qilish o‘rniga, kichik qadamlar bilan jamoatni jalb qilish muhimligini ta’kidlaydi. Matsonn: “Biz yorug‘lik tomon yugurish pozitsiyasidan e’tiqod hayotiga yondashamiz, zulmatdan qochish emas. Men sizga benzinli qirqgichingizni ishlatmang, demadim. Men faqat changlatuvchilar haqida o‘ylang, dedim. Iso ham dala zambaklarini ko‘rib chiqishni buyurgan.”

Source: www.dw.com