G7 yetakchilari Fransiyaning Evian shahrida bo‘lib o‘tgan sammitda Kongo Demokratik Respublikasida (KDR) avj olgan Ebola epidemiyasiga qarshi “kuchli va muvofiqlashtirilgan” xalqaro choralar ko‘rishga chaqirdi. Ular AQSh va Yevropa Ittifoqi (YI) tomonidan ko‘rsatilayotgan yordamni yuqori baholadi.

Yevropa Komissiyasi rahbari Ursula fon der Leyen “sog‘liqni saqlash xavfsizligi umumiy xavfsizlikdir” deb ta’kidladi. Komissiya KDRdagi epidemiya bilan bog‘liq holda 493 million yevro (taxminan 580 million dollar) miqdoridagi gumanitar yordam va sog‘liqni saqlash xavfsizligi dasturini kengaytirishni ma’lum qildi.

KDR hukumati ma’lumotlariga ko‘ra, kam uchraydigan Bundibugyo shtammi sabab bo‘lgan epidemiya 837 tasdiqlangan holat va 196 o‘limga olib keldi. Shulardan 29 ta holat bir sutka ichida qayd etilgan. Kasallik asosan Ituri provinsiyasida, Uganda bilan chegaradosh mojaroli hududda tarqalmoqda.

Yevropa Komissiyasi mablag‘lar “birinchi qatordagi tibbiy yordam”, Buyuk Ko‘llar mintaqasi va qo‘shni Ugandadagi gumanitar yordam, vaktsina va davolash usullari bo‘yicha tadqiqotlar, shuningdek, sog‘liqni saqlash tizimlarini yaxshilashga yo‘naltirilganini bildirdi.

G7 bayonotida “mavjud vaktsinalar, diagnostika va terapiya ushbu noyob virus shtammiga qarshi to‘liq samarali emas” deb ta’kidlandi. Xalqaro Qizil Xoch qo‘mitasi epidemiya hali cho‘qqisiga chiqmaganligi haqida ogohlantirdi.

Uganda vitse-prezidenti Jessika Alupo mamlakatiga nisbatan sayohat cheklovlarini bekor qilishga chaqirib, “Uganda Ebola epidemiyasini samarali nazorat qilmoqda” dedi. Biroq, bir qancha davlatlar KDR va Ugandaga nisbatan cheklovlar joriy qilgan.

Source: www.dw.com