Polsha NATO aʼzosi boʻlib, oʻz mudofaa qobiliyatini oshirish maqsadida Shvetsiyadan uchta suv osti kemasiga buyurtma berdi. Shartnoma 4,2 milliard yevro (4,8 milliard dollar) qiymatida baholanmoqda.

Polsha va Shvetsiya o‘rtasidagi kelishuv dushanba kuni Boltiq dengizidagi Gdynia portida imzolandi. Polsha Davlat g‘aznachiligi qurol-yarog‘ agentligi Shvetsiyaning Saab kompaniyasidan uchta yangi suv osti kemasini sotib olishni rasmiylashtirdi.

Saab kompaniyasining bayonotiga ko‘ra, birinchi kema 2030-yilda yetkazib beriladi, oxirgisi esa 2038-yilda topshiriladi. Fransiya, Germaniya, Italiya, Janubiy Koreya va Ispaniya kompaniyalari ham tenderda qatnashgan edi.

Polsha Bosh vaziri Donald Tusk kelishuvni X’da eʼlon qilib, Shvetsiyalik hamkasbi Ulf Kristersson bilan qo‘l siqishgan suratini joyladi. Kristerssonning yozishicha, „kuchli Polsha suv osti floti Boltiq dengizi va butun NATO xavfsizligini mustahkamlaydi“.

Saab kompaniyasi A26 (Blekinge sinfi) kemalarini, shuningdek, qurol-yarog‘, o‘quv va texnik xizmat ko‘rsatish paketlarini yetkazib beradi. Polshada taʼmirlash va texnik xizmat ko‘rsatish markazlari ochiladi.

Hozirda Polshada faqat bitta eskirgan rus suv osti kemasi mavjud. 2030-yilgacha Polsha harbiy-dengiz kuchlari Shvetsiyaning HMS Södermanland kemasidan foydalanadi.

Source: www.dw.com