Buyuk Britaniya Met Office ma'lumotlariga ko‘ra, o‘tgan oy Angliyada iyun oyi rekord darajada issiq bo‘lgan. O‘rtacha harorat 17,1 darajani tashkil etib, bu 1884-yildan beri eng yuqori ko‘rsatkichdir.

Avvalgi rekord 2025-yil iyunida 16,9 daraja bilan qayd etilgan edi. O‘tgan oy oxirida kuzatilgan kuchli issiqlik to‘lqini sababli bir necha kun davomida favqulodda issiqlik ogohlantirishlari e'lon qilindi.

21-27-iyun kunlari Buyuk Britaniyaning ayrim hududlarida harorat 30 darajadan oshib, 26-iyun kuni Norfolkdagi Lingvudda 37,7 daraja qayd etildi – bu iyun oyi uchun mutlaq rekorddir.

Shuningdek, 25-iyun kuni Kardiffda eng yuqori tungi minimal harorat qayd etildi – 23,5 daraja. Issiqlik to‘lqini tufayli 1000 dan ortiq maktab va bog‘chalar yopildi, jamoat transportida uzilishlar yuz berdi.

Tanqidchilar mamlakatni jazirama issiqlikka tayyor emas deb hisoblamoqda. Iqlimshunoslar Buyuk Britaniya hukumatini infratuzilmani issiq yozga moslashtirishga chaqirmoqda.

Issiqlik to‘lqini Yevropaning ko‘plab mamlakatlariga, jumladan Fransiya, Germaniya, Slovakiya, Serbiya, Xorvatiya, Italiya, Avstriya va G‘arbiy Ukrainaga ham ta'sir ko‘rsatdi. Fransiyaning o‘zida 1000 dan ortiq o‘lim qayd etilgan.

Jahon ob-havo atributsiyasi tashkiloti hisobotida olimlar xavfli ob-havoning asosiy sababi sifatida iqlim o‘zgarishini ko‘rsatib, qazib olinadigan yoqilg‘ilardan voz kechish zarurligini ta'kidlamoqda.

Source: www.aljazeera.com