Nyu-York politsiyasi ma'lumotlariga ko‘ra, bir kishi Birlashgan Millatlar Tashkiloti (BMT) bosh qarorgohi oldida Tibet bayrog‘ini ushlab, o‘zini yoqib yuborgan va og‘ir kuyishlar natijasida vafot etgan.
Nyu-York politsiya departamenti payshanba kuni mahalliy vaqt bilan soat 18:30 atrofida favqulodda qo‘ng‘iroqni qabul qilgan va voqea joyida 52 yoshli erkakning butun vujudi og‘ir kuygan holda topilganini ma'lum qildi.
Jabrlangan shifoxonaga olib borilgan, ammo shifokorlar uning hayotini saqlab qola olmagan. Politsiya tergov davom etayotganini bildirdi.
BMT Bosh kotibi Antoniu Guterrishning matbuot kotibi AFP agentligiga yo‘llagan bayonotida: “Biz bu fojiali va dahshatli voqeadan qayg‘udamiz va uning oilasiga hamdardlik bildiramiz”, dedi.
AQSh ommaviy axborot vositalari va Tibet tarafdori faolning ta'kidlashicha, marhum Tibet mustaqilligi tarafdori bo‘lgan. Politsiya bu da'voni tasdiqlamadi va uning harakati uchun hech qanday sababni keltirmadi.
Xalqaro Tibet Kampaniyasi prezidenti Tencho Gyatso marhumning ismi Lobga Rangzen ekanligini ma'lum qildi. Gyatso AFPga bergan intervyusida: “Lobga Tibet uchun tinimsiz kurashgan, Tibetdagi inson huquqlari inqirozi haqida tinch yo‘l bilan xabardorlikni oshirishga bag‘ishlangan shaxs edi”, dedi.
Gyatso, shuningdek, Rangzen Xitoyning “Etnik birlik va taraqqiyotni rag‘batlantirish to‘g‘risida”gi yangi qonunini qoralaganini aytdi. Pekin bu qonun etnik guruhlar o‘rtasida umumiy milliy o‘zlikni shakllantirishga qaratilganini ta'kidlaydi.
Xorijdagi faollar esa bu qonun uyg‘ur va tibetliklar kabi etnik ozchiliklarning huquqlarini yanada pasaytirishiga ishonmoqda. AQSh va Yevropa Ittifoqi ham ushbu qonun yuzasidan xavotir bildirgan.
Xalqaro Tibet Kampaniyasi ma'lumotlariga ko‘ra, 2009 yildan 2022 yilgacha Tibetliklar tomonidan 150 dan ortiq o‘zini yoqish holatlari qayd etilgan.
Pekin 1950 yilda Tibetga qo‘shin kiritgan va bu hududni Xitoyning ajralmas qismi deb hisoblaydi. Xalqaro inson huquqlari tashkilotlari va muhojirlar Xitoyning Tibetdagi zulmkor siyosatini tanqid qiladi, ammo Pekin bu ayblovlarni rad etadi.
90 yoshli Tibet ruhoniyi Dalay Lama 1959 yildagi qo‘zg‘olon bostirilganidan keyin Hindistonda yashab kelmoqda. Xitoy Tibetning surgundagi hukumatini tan olmaydi va 2010 yildan beri Dalay Lama vakillari bilan muzokara olib bormagan.
Source: www.aljazeera.com