Xitoy Mudofaa vazirligi yakshanba kuni e’lon qilgan bayonotga ko‘ra, Xitoy va Rossiya harbiy-dengiz kuchlari kelasi hafta Xitoyning sharqiy qirg‘oqlari yaqinidagi suv va havo hududlarida qo‘shma mashg‘ulotlar o‘tkazadi.

Yillik mashg‘ulotlar Qingdao yirik porti yaqinida bo‘lib o‘tadi va undan so‘ng Tinch okeanining noma’lum hududlarida qo‘shma dengiz patrullari amalga oshiriladi.

Rossiya davlat ommaviy axborot vositalarining xabar berishicha, Rossiya Tinch okean flotining kreyseri, korveti, dizel-elektr suv osti kemasi va qutqaruv kemasi Qingdaoga yetib kelgan. Mashg‘ulotlar 14-iyuldan 13-iyulgacha davom etadi.

Xitoyning Shimoliy teatr qo‘mondonligi ma’lumotlariga ko‘ra, ishtirok etuvchi kuchlar tarkibiga ikkita esminets, fregat, suv osti kemasi, ta’minot kemasi va qutqaruv kemasi kiradi.

Ikki davlat harbiy-dengiz kuchlari razvedka, havo va raketa hujumlariga qarshi mudofaa hamda yer usti nishonlariga zarba berish bo‘yicha mashqlarni amalga oshirishi kutilmoqda.

Ushbu manevrlar Rossiya prezidenti Vladimir Putinning Xitoyga tashrifidan taxminan ikki oy o‘tib amalga oshirilmoqda. O‘sha safar chog‘ida Putin ikki tomonlama munosabatlar “misli ko‘rilmagan darajada yuqori pog‘onaga” chiqqanini ta’kidlagan edi.

Xitoy rahbari Si Szinpin esa ikki davlat hamkorligini “mustahkam” deb atadi. Ikki yirik diplomatik va iqtisodiy sherik 2012-yildan beri “Joint Sea” mashg‘ulotlarini o‘tkazib kelmoqda.

O‘tgan yilgi mashg‘ulotlar Rossiyaning Vladivostok porti yaqinida bo‘lib o‘tgan va undan so‘ng Tinch okeanida qo‘shma patrullar amalga oshirilgan edi.

Xitoy Rossiyaning Ukrainaga to‘liq miqyosli bostirib kirishini hech qachon qoralamagan. Pekin o‘zini neytral tomon deb e’lon qilgan va muntazam ravishda tinchlik muzokaralariga chaqirib kelmoqda.

Source: www.aljazeera.com