Fransiya prezidenti Emmanuel Makron dushanba kuni kechqurun Damashqqa yetib keldi. U Bashar Asad hokimiyatdan ketganidan keyin Suriyaga tashrif buyurgan birinchi Yevropa Ittifoqi yetakchisi bo‘ldi.

Suriya tashqi ishlar vaziri Asaad ash-Shayboniy Makron va Fransiya tashqi ishlar vaziri Jan-Noel Barroni aeroportda kutib oldi. Makron ijtimoiy tarmoqlarda “Suriya xalqiga sadoqatimni ifodalash uchun keldim. Suveren, xilma-xilligida birlashgan va qo‘shnilari bilan tinchlikda yashaydigan Suriya uchun” deb yozdi.

Yevropa Komissiyasi rahbari Ursula fon der Lyayen va Ukraina prezidenti Volodimir Zelenskiy ham yil boshida Damashqqa tashrif buyurgan edi. Prezident Ahmad ash-Sharaa xalqaro aloqalarni tiklashga harakat qilmoqda, biroq uning o‘tmishi – “al-Nusra fronti” terrorchilik guruhining asoschisi va rahbari bo‘lgani – G‘arbda shubha uyg‘otadi.

Makron 2025-yil may oyida ash-Sharaani Parijda qabul qilgan edi. Fransiya prezidenti Suriyaga qarshi sanksiyalarni olib tashlashni qo‘llab-quvvatladi. Biroq Suriyadagi xavfsizlik vaziyati hali ham keskin: Damashqdagi kafeda portlashda 10 kishi halok bo‘ldi, diniy ozchiliklarga hujumlar davom etmoqda.

Makron bilan birga CMA CGM va TotalEnergies rahbarlari kelgan. Qayta qurish va investitsiya xavfsizligi muhokama qilinadi. Fransiya prezidenti ash-Sharaadan ozchiliklarni himoya qilish va’dalarini bajarishni talab qilishi kutilmoqda. Shuningdek, 23 ta arxeologik ashyo Suriyaga qaytariladi.

Source: www.dw.com