Indoneziyaning Sulavesi oroli janubidagi dengizda uch kun davomida qolib ketgan besh kishi, jumladan yetti yoshli qiz qutqarildi. Kamida 20 kishini qidirish ishlari davom etmoqda.

Besh omon qolgan – bir erkak, uch ayol va qiz – shanba kuni kechqurun Matallang oroli yaqinida baliqchi qayig‘i tomonidan topilgan va qutqaruv kemasiga olib ketilgan.

Ular KM Nurul Salsa kemasi chorshanba kuni 78 yo‘lovchi va ekipaj a’zosi bilan dvigatel nosozligi tufayli cho‘kib ketganidan keyin baliq ovlash tuzog‘i va suvda qolgan qoldiqlarga yopishib qolgan.

Mahalliy qutqaruv xodimi Muhammad Arif Anvarning so‘zlariga ko‘ra, “Kema cho‘kib ketgandan so‘ng, har biri o‘zini qutqarish uchun qo‘l ostidagi vositalardan foydalangan. Ular kanistrlar va tiqin bo‘laklarini arqon bilan bog‘lab, ustiga chiqishgan.”

Ular qutqaruvchilarga 25 kishilik guruhning bir qismi bo‘lganliklarini, ammo kuchli shamol tufayli boshqalardan ajralib qolganliklarini aytishgan.

Mahalliy matbuot xabarlariga ko‘ra, kema cho‘kib ketgan kunning ertasiga 47 kishi qutqarilgan va bir kishi cho‘kib ketgan. Beshta katta kema, razvedka samolyoti va vertolyot qidiruv ishlarida ishtirok etmoqda.

KM Nurul Salsa Jampia orolidan Selayar orolidagi Benteng portiga yo‘l olgan edi. U portdan taxminan 43 dengiz mili (79 km) uzoqlikda cho‘kib ketgan.

Indoneziyada yo‘lovchi kemalari keng tarqalgan transport turi hisoblanadi, ammo xavfsizlik standartlarining pastligi va haddan tashqari yuklanish tez-tez baxtsiz hodisalarga sabab bo‘ladi. Shu oy boshida Balida 65 kishilik parom cho‘kib ketishi oqibatida kamida olti kishi halok bo‘lgan va o‘nlab kishi bedarak yo‘qolgan edi.

Source: www.aljazeera.com