Ozarbayjon hukumati tomonidan maktablarda hijob kiyishni bilvosita taqiqlovchi qarorning qabul qilinishi jamiyatda keskin noroziliklarni keltirib chiqardi. O'tgan oy tasdiqlangan ushbu tuzatish musulmonlarning bosh kiyimini to'g'ridan-to'g'ri taqiqlamasa-da, hukumat ta'biricha «dunyoviylik tamoyilini» buzadigan kiyimlarni ta'lim muassasalarida qo'llashni cheklaydi. Yangi tartib qabul qilingach, bir nechta maktablar o'quvchilar va o'qituvchilarni darslarga kiritishni to'xtatdi, bu esa noroziliklar to'lqiniga sabab bo'ldi.
O'qituvchi Zahra Hasanova Al Jazeera nashriga bergan intervyusida unga endilikda maktabda hijob kiyish taqiqlangani haqida xabar berishganini ma'lum qildi. Uning ta'kidlashicha, bu qaror uni qattiq ranjitgan, chunki hijob shaxsiy tanlov masalasidir. Rasmiy manbalarning ma'lum qilishicha, davlat umumta'lim muassasalari o'quvchilari uchun forma tavsiflariga kiritilgan ushbu o'zgarishlar mamlakatning dunyoviy qadriyatlarini saqlab qolish va yagona kiyinish kodini ta'minlashga qaratilgan. Qizig'i shundaki, aholisining qariyb 96 foizi o'zini musulmon deb e'lon qilgan mamlakat konstitutsiyasida diniy erkinliklar kafolatlanganiga qaramay, bunday cheklovlar joriy etilmoqda.
Cheklovlarga qarshi noroziliklar ijtimoiy tarmoqlarda ham keng quloch yozib, o'quvchilarning maktabdan qaytarilayotganda yig'layotgani aks etgan videolar tarqaldi. Mahalliy OAV ma'lumotlariga ko'ra, kamida ikkita maktab o'quvchilari darslarni boykot qilgan. Shuningdek, 2020 yilda davlatga xiyonatda ayblanib 13 yilga ozodlikdan mahrum etilgan jurnalist Polad Aslanov ham yangi talablarga qarshi ochlik e'lon qilgani ma'lum bo'ldi.
Noroziliklar to'lqini qo'shni Turkiyaga ham tarqalib, Istanbuldagi Ozarbayjon konsulligi qarshisida namoyishlar bo'lib o'tdi. Ishtirokchilar Bokudagi hukumatni qarorni qayta ko'rib chiqishga chaqirdilar. Ozarbayjon rahbariyati esa Turkiyadagi noroziliklarga nisbatan norozilik bildirib, mamlakat ichki hayotiga aralashmaslik kerakligini ogohlantirdi. Turkiya rahbari Rajab Tayyip Erdo'g'an BMT Bosh Assambleyasidagi nutqida musulmon ayollar kamsitishlarga duch kelayotganini ta'kidlab o'tdi.
Source: www.aljazeera.com