Xitoy davlat ommaviy axborot vositalarining xabar berishicha, Dandun va Sinuyju shaharlarini bog'lovchi ko'p yillardan buyon kechiktirilib kelingan yangi avtomobil ko'prigi nihoyat ochildi. Ushbu uch kilometrlik inshoot ikki qo'shni davlat o'rtasidagi savdo aloqalarining jonlanayotganidan darak berishi aytilmoqda.

Xitoy o'zining shimoliy qo'shnisining eng yirik savdo hamkori hisoblanib, Pxenyanning yadroviy dasturi sababli joriy etilgan og'ir xalqaro sanksiyalar sharoitida muhim iqtisodiy tayanch vazifasini o'tamoqda. Biroq, loyihaning ochilishi 2014-yilga rejalashtirilgan bo'lishiga qaramay, Shimoliy Koreya tomoni yo'llar va bojxona infratuzilmasini qurishni to'xtatib qo'gani hamda ikki tomonlama munosabatlar sovib qolgani sababli cheksiz muddatga kechiktirilgandi.

Xitoy hukumati vakillari ushbu ko'prikni an'anaviy do'stlik ramzi deb atab, ikki mamlakat o'rtasidagi munosabatlarda yangi sahifa ochilayotganini da'vo qilishmoqda. Shunga qaramay, mutaxassislarning fikricha, BMT sanksiyalari amalda ekan, savdo hajmining keskin va to'satdan o'sishi kutilmaydi, chunki Pxenyan Xitoy tovarlarining ichki bozorga haddan tashqari kirib kelishidan ehtiyotkorona yondashmoqda.

Tahlilchilarning ta'kidlashicha, oxirgi paytlarda Rossiya va Shimoliy Koreya o'rtasidagi yaqinlashuv fonida Pekin Pxenyandagi ta'sirini saqlab qolishga harakat qilmoqda. Xususan, Ukrainadagi mojaro va Moskva bilan yuzaga kelgan harbiy hamkorlik fonda Xitoy rahbariyati o'zining geosiyosiy ta'sir doirasini mustahkamlash maqsadida ushbu infratuzilma loyihasini faollashtirishga majbur bo'lgan.

Source: www.bbc.co.uk