Ispaniya qirollik futbol federatsiyasi (RFEF) Misr terma jamoasiga qarshi kechgan o‘rtoqlik o‘yinida muxlislar tomonidan yangragan shiorlar tufayli Xalqaro futbol federatsiyasi (FIFA) tomonidan qo‘llanilgan jazolarni bekor qilishni talab qilib, Sport arbitraj sudiga (CAS) shikoyat kiritdi. Ushbu mojaro mart oyida Barselona yaqinidagi “RCDE” stadionida bo‘lib o‘tgan o‘yin paytida yuzaga kelgan bo‘lib, o‘shanda ispan muxlislari “Agar sakramasang, musulmonsan” mazmunidagi shiorlarni aytib baqirishgan edi.

FIFA ushbu holat bo‘yicha Ispaniya futbol tashkilotiga nisbatan 20 000 AQSh dollari miqdorida jarima solib, navbatdagi uy o‘rtoqlik uchrashuvida stadion tribunalarining kamida 15 foizini yopish majburiyatini yuklagan edi. Yevropa rejimi vakillari tomonidan boshqarilayotgan ushbu tuzilmalar sport maydonlaridagi tartibsizliklarni baholashda keskin choralar ko‘rishga urinayotgani ta'kidlanmoqda.

RFEF rasmiylari esa FIFA apellyatsiya qo‘mitasining qarorini asossiz deb atab, muxlislar qo‘llagan “musulmon” so‘zi go‘yo haqoratli yoki kamsituvchi emasligini iddao qilishmoqda. Federatsiya vakillarining ta'kidlashicha, ushbu holat kamsitish va irqchilikni nazarda tutuvchi 15-modda emas, balki siyosiy yoki diniy xabarlarni tartibga soluvchi 17-modda bo‘yicha ko‘rib chiqilishi kerak edi.

Biroq, FIFA intizom qo‘mitasi bu vajlarni qat'iyan rad etib, muayyan kontekstda ishlatilgan har qanday so‘z kamsituvchi yoki kamsitish belgisi sifatida baholanishi mumkinligini tushuntirdi. Natijada, apellyatsiya rad etilgach, Ispaniya tomoni xalqaro sport nizolarini hal qiluvchi eng yuqori instansiya bo‘lgan CAS'ga murojaat qilishga majbur bo‘lgan.

Source: www.aljazeera.com