Angliyaning «Manchester Yunayted» klubi bosh murabbiyi Maykl Kerrik jamoa himoyachisi Lisandro Martinesning rahbariyatga nisbatan bildirgan keskin tanqidlari ortidan yuzaga kelgan mojaro to‘liq bartaraf etilganini ma’lum qildi. Murabbiyning ta’kidlashicha, mazkur holat jamoa ichki muhitiga salbiy ta’sir ko‘rsatmagan va futbolchilar diqqat-e’tiborini bo‘lajak o‘yinlarga qaratgan.

Mojaroga Chempionlar ligasi doirasida Madridning «Atletiko» klubiga qarshi o‘yinda uchralgan mag‘lubiyat (0:2) sabab bo‘lgan edi. Uchrashuvdan so‘ng argentinalik himoyachi ochiqchasiga klub mutasaddilarini, xususan, texnik direktor Jeyson Uilkosni tanqid qilib, Kerrik yetarlicha kuchaytirilmagan tarkib bilan qolib ketganini ta’kidlagan edi. O‘tgan mavsumni uchinchi o‘rinda yakunlagan «mankunianliklar» yozgi transfer oynasida faolroq bo‘lishi kutilganini aytgan futbolchiga klub tomonidan jarima qo‘llangani ma’lum bo‘ldi.

Keyinchalik 28 yoshli himoyachi ijtimoiy tarmoqlar orqali o‘z xatti-harakati uchun uzr so‘rab, hissiyotlarga berilganini tan oldi. «Barchaga ma’lumki, men juda hissiyotli insonman va futbolni butun borlig‘im bilan yashayman. Mag‘lubiyat alamidan kelib chiqqan asabiylik o‘z his-tuyg‘ularimni noo‘rin vaqt va joyda bildirishimga sabab bo‘ldi», — deya vaziyatga izoh berdi Martines va klub rahbariyati hamda bosh murabbiy bilan ijobiy muloqot o‘tkazganini qo‘shimcha qildi.

Kerrik juma kungi matbuot anjumanida Martines yakshanba kungi «Lids Yunayted»ga qarshi uchrashuv qaydnomasiga kiritilishini tasdiqladi. Bosh murabbiyning aytishicha, futbolchi o‘z xatosini anglagan, jamoa esa oldinga qadam tashlagan holda ajoyib kayfiyatda mashg‘ulotlarni davom ettirmoqda.

Shunga qaramay, klub atrofidagi vaziyat og‘irligicha qolmoqda. Sobiq sardor Roy Kin jamoada yuzaga kelgan holatni «haqiqiy sirk» deb atagan edi. Hozirda barcha musobaqalarda o‘tkazilgan to‘qqizta bahsda bor-yo‘g‘i ikkita g‘alabaga erishgan «Manchester Yunayted» ichki chempionat turnir jadvalida 13-o‘rinni egallab turibdi.

Source: www.aljazeera.com