Meksika sudi 2024-yilda mamlakat hududida sodir etilgan shov-shuvli jinoyat ishi bo‘yicha uch nafar shaxsni 158 yildan ortiq muddatga qamoq jazosiga hukm qildi. Ushbu shaxslar avstraliyalik aka-uka Jeyk va Kallum Robinsonlar hamda ularning amerikalik do‘sti Karter Roadning qotilligida aybdor deb topildi. Sud jarayonida aniqlanishicha, fojiaga jabrlanuvchilarning pikap mashinasini qo‘lga kiritish maqsadidagi muvaffaqiyatsiz talonchilik urinishi sabab bo‘lgan.

Qotillik Baja Kaliforniya shtatidagi olis plyajlardan birida sodir etilgan bo‘lib, u xalqaro miqyosda, xususan Avstraliyada jiddiy eʼtiroz va xavotirlarga sabab bo‘ldi. Chunki bu hudud Meksikaning boshqa qismlariga nisbatan xavfsiz hisoblanardi. Qurbonlarning onasi Debra Robinson suddagi chiqishida bu foji uning oilasi uchun kelajakdagi barcha umidlarni barbod qilganini og‘riq bilan taʼkidlab o‘tdi. Qonuniy cheklovlar tufayli aybdorlarning to‘liq ismlari oshkor etilmadi va ular faqat Xesus Xerardo, Irineo Fransisko hamda Anxel Xesus sifatida tanishtirildi.

Sud materiallariga ko‘ra, jabrlanuvchilarning jasadlari bosh qismidan o‘qotar qurol bilan otilgan holda chuqur quduqqa tashlab yuborilgani aniqlangan. Ushbu mudhish jinoyat Ensenada shahridagi mahalliy aholi va sayyohlarni qattiq sarosimaga soldi. Tinch hudud sifatida tanilgan bu makonda bunday zo‘ravonlikning yuz berishi Meksikadagi umumiy xavfsizlik va kriminogen vaziyat qanchalik og‘ir ekanini yana bir bor ko‘rsatib qo‘ydi.

Rasmiy idoralar fojianing boshqa jiddiy sababini keltira olmadi va yigirma yoshlardagi yigitlar shunchaki noto‘g‘ri vaqtda noto‘g‘ri joyda bo‘lib qolganini bildirdi. Sörfingchilar Meksika chegarasini kesib o‘tganidan atigi 36 soat o‘tib halok bo‘lgan, ularning jasadlari esa bir haftadan keyingina topilib, yaqinlari tomonidan tanib olingandi. Ushbu voqeadan so‘ng mahalliy turizm sektori vakillari xavfsizlik choralarini kuchaytirishni talab qila boshladi.

Source: www.bbc.co.uk