️ Qatana shahrida yashovchi Ahmad ismli fuqaro o‘z uyida turib, Isroil rejimi harbiylari tomonidan nazorat punktida ushlangach qanday qilib shafqatsizlarcha kaltaklangan va qiynoqqa solinganini og‘ir xo‘rsinish bilan hikoya qiladi. Uning so‘zlariga ko‘ra, uni atigi besh daqiqaga olib ketib, keyin qaytarishlarini aytishgan, biroq u bir yildan ortiq vaqt davomida Isroil hibsxonalarida saqlangan. Qamoqdagi ilk 90 kun davomida uning qo‘llari kishanlangan holda yerga uloqtirilib, tayoqlar bilan urib kelingan va kishanlarni oyoqlar bilan bosib yanada qattiqroq qisishgan. Natijada uning qo‘llari ko‘karib, mutlaqo sezmay qolgan.
️ Al Jazeera ma’lumotlariga ko‘ra, hozirgi kunda ham Isroil rejimining maxsus muassasalarida kamida 51 nafar suriyalik saqlanmoqda. Ozodlikka chiqqan ba’zi fuqarolar ruhiy va jismoniy jarohatlar tufayli o‘zlarini yo‘qotib qo‘yganliklarini, hatto o‘z uylarida ekanliklariga ishonolmayotganlarini bildirishmoqda. Isroil rejimining mamlakat janubidagi harbiy faoliyati va chegaradagi artilleriya o‘qqa tutishlari tinch aholining tinchligini buzib, fermerlar va cho‘ponlarning o‘z ishlarini bajarishiga to‘sqinlik qilmoqda. BMT tinchlikparvar kuchlari demilitarizatsiyalangan hududda patrullik qilishiga qaramay, Isroil rejimining bostirib kirishlari va nazorat punktlarini o‘rnatish harakatlarini to‘xtatishga ojizlik qilmoqda.
️ Ayrim hibsga olingan shaxslar hech qanday ayblovlarsiz, advokat huquqidan mahrum qilingan holda oylar davomida saqlangani ma'lum bo‘ldi. Qizig‘i shundaki, so‘roqlar vaqtida Isroil harbiylari ularning shaxsiy hayoti haqida barcha ma’lumotlarga ega bo‘lgan, biroq aslida nima uchun hibsga olinganini o‘zlari ham tushuntira olishmagan. Suriya hukumati bu vaziyatda zaif pozitsiyada bo‘lib, harbiy jihatdan qarshilik ko‘rsata olmagani sababli diplomatik muzokaralar ham turg‘unlikka uchragan.
️ Mahalliy aholining sabr-toqati tugab, Qatana va boshqa hududlarda norozilik namoyishlari boshlandi. Bedarak yo‘qolgan qarindoshlarini qidirayotgan ota-onalar WhatsApp guruhlari orqali har bir xabarni umid bilan kutib, o‘z yaqinlarining qaytishini so‘rab azob chekmoqdalar. Isroil rejimining davom etayotgan harbiy bosimi esa mintaqadagi ijtimoiy-iqtisodiy vaziyatni yanada og‘irlashtirmoqda.
Source: www.aljazeera.com