Keniyadagi sud Shakahola o‘rmonidagi dahshatli fojiaga aloqador bo‘lgan ommaviy ochlik sektasining yetakchisi Pol Makkenzini 191 kishining o‘limi uchun qotillikda aybdor deb topdi. Mombasa sudi dushanba kuni e'lon qilgan qarorga ko‘ra, o‘zini "pastor" deb atagan shaxs va uning o‘nlab sheriklari 190 nafar bola va bir nafar kattaning o‘limida aybdor deb topildi.

Prokurorlarning ma'lum qilishicha, Makkenzi va uning "Xushxabar xalqaro cherkovi" deb nomlangan tuzilmasi dunyoning oxiri yetib kelishidan oldin jannatga borish va "Iso bilan uchrashish" bahonasida o‘z izdoshlarini, jumladan, bolalarni ochlikdan o‘lishga majbur qilgan. Mazkur fojiali voqea butun mamlakatni larzaga solib, huquqni muhofaza qiluvchi organlarning ish uslubini qayta ko‘rib chiqishga majbur qildi.

Huquq-tartibot idoralari xodimlari Makkenzini 2023-yilda kelib tushgan maxfiy xabardan so‘ng hibsga olgan edi. Shundan keyin Keniya janubi-sharqidagi sohil bo‘yida joylashgan Shakahola o‘rmonidan sayoz qabrlarga dafn etilgan jasadlar ommaviy ravishda topila boshlandi. Sud jarayonida Makkenzi qurbonlarni ochlikka majbur qilmaganini da'vo qilgan bo‘lsa-da, bu vajlar mahkama tomonidan qat'iyan rad etildi.

Ayblanuvchilar ilgari bildirilgan teraktlar uyushtirish, odamlarni radikallashtirish va bolalarning ta'lim olishiga to‘sqinlik qilish kabi boshqa ayblovlar bo‘yicha o‘zlarini aybsiz deb e'lon qilishgan edi. Mazkur shov-shuvli ish bo‘yicha tergov va sud jarayonlari davom etishi kutilmoqda.

Source: www.aljazeera.com