Harbiy mojarolar va an’anaviy savdo yo‘llarining buzilishi fonida rivojlangan mamlakatlar ichki muammolarga ko‘proq e’tibor qaratmoqda. Bu holat O‘zbekiston kabi rivojlanayotgan mamlakatlarga investitsiyalar oqimini kamaytirish xavfini keltirib chiqarishi mumkin. EUROUZ assotsiatsiyasining “O‘zbekistonning iqtisodiy sharhi — 2026” tadbirida xalqaro moliya institutlari ekspertlari bu masalaga javob berishdi.

Yevropa investitsiya banki (YeIB) mintaqaviy idorasi rahbari Olive Kueni ta’kidlashicha, Yevropa institutlari Yevropa Ittifoqidan tashqaridagi faoliyatini to‘xtatishni rejalashtirmayapti. Uning so‘zlariga ko‘ra, YeIB O‘zbekistonda Markaziy Osiyoni qamrab oladigan mintaqaviy vakolatxonasini ochish rejalarini amalga oshirayotgani uzoq muddatli hamkorlikni tasdiqlaydi. Bank Yevropa Ittifoqining Markaziy Osiyodagi 12 milliard yevrolik loyihalar paketini moliyalashtirishda ishtirok etadi.

Jahon bankining O‘zbekistondagi vakolatxonasi katta iqtisodchisi Pinar Yashar global noaniqlik va resurslarning cheklanganligi sharoitida xalqaro institutlar tanlab harakat qilishini ta’kidladi. Uning fikricha, O‘zbekiston makroiqtisodiy barqarorlikni ta’minlagan va islohotlarni davom ettirgan holda, investorlar uchun ajralib turadigan davlatlardan biridir. Ekspert O‘zbekistonni “Markaziy Osiyoda porlayotgan yulduz” deb atab, uning demografik va bozor salohiyatini qayd etdi.

Biroq, Pinar Yashar ogohlantirishicha, O‘zbekiston investitsiya muhitini yaxshilash, bozor iqtisodiyotiga o‘tish va investorlar himoyasini kuchaytirishda davom etishi kerak. Agar bu yo‘ldan chetga chiqilsa, rivojlangan iqtisodiyotlarning e’tibori kamayishi mumkin. Shu bilan birga, global mojarolar va ichki ustuvorliklar tufayli investitsiyalar oqimining sekinlashishi xavfi saqlanib qolmoqda.

Source: www.gazeta.uz