O‘zbekistonning agrosanoat kompleksini modernizatsiya qilish va qishloq xo‘jaligiga innovatsion yechimlarni joriy etish bo‘yicha muhim muzokaralar bo‘lib o‘tdi. 24-mart kuni Sanoat, investitsiyalar va savbo vaziri Laziz Qudratov John Deere kompaniyasining MDH mintaqasi bo‘yicha vitse-prezidenti Piter Saks boshchiligidagi delegatsiyasi bilan uchrashuv o‘tkazdi. Uchrashuvda zamonaviy texnika yetkazib berish, servis infratuzilmasini rivojlantirish va raqamli texnologiyalarni integratsiya qilish masalalari muhokama qilindi.

Muzokaralar davomida hamkorlikni mustahkamlash, to‘g‘ridan-to‘g‘ri investitsiyalarni jalb qilish va respublika hududida mahsulot ishlab chiqarishni lokalizatsiya qilish imkoniyatlari ham ko‘rib chiqildi. John Deere kompaniyasi 1837-yilda tashkil etilgan global korporatsiya bo‘lib, qishloq xo‘jaligi, qurilish va o‘rmon xo‘jaligi texnikasini ishlab chiqarishda dunyo yetakchilaridan biri hisoblanadi. Kompaniya 170 dan ortiq mamlakatlarda faoliyat yuritadi, keng tarqalgan distribyutor tarmog‘i va ilmiy-ishlab chiqarish markazlariga ega.

Uchrashuv natijalarida uzoq muddatli hamkorlikka o‘zaro qiziqish tasdiqlandi. Tomonlar O‘zbekistonning agrar sektorining samaradorligi va ekologik barqarorligini oshirishga qaratilgan qo‘shma loyihalarni amalga oshirish uchun muloqotni davom ettirishga tayyorligini bildirdilar. Bu kelishuvlar mamlakat qishloq xo‘jaligini modernizatsiya qilish va global texnologiyalarni joriy etish bo‘yicha muhim qadam hisoblanadi.

Ilgari O‘zbekiston Italiyadan sun’iy intellektdan foydalanadigan agrotexnologiyalarni sotib olish niyatida ekanligi ma’lum bo‘lgan. Buni qishloq xo‘jaligi vaziri Ibrohim Abdurahmonov Toshkentda bo‘lib o‘tgan “Italiya – Markaziy Osiyo – Ozarbayjon” biznes-forumida e’lon qilgan edi. Bu harakatlar mamlakatning qishloq xo‘jaligini rivojlantirish va xalqaro hamkorlikni kengaytirishga qaratilgan sa’y-harakatlarining bir qismidir.

Source: kun.uz