O‘zbekiston Prezidenti Shavkat Mirziyoyev 1-aprel kuni mamlakatimizga tashrif buyurgan Birlashgan Millatlar Tashkilotining Turizm bo‘yicha tashkiloti (BMT Turizm) Bosh kotibi Shayxa Nosir Al Novais bilan uchrashuv o‘tkazdi. Uchrashuvda turizm sohasidagi hamkorlikni kengaytirish istiqbollari muhokama qilindi.

Prezident Mirziyoyev O‘zbekistonda turizm infratuzilmasini modernizatsiya qilish, aviatsiya aloqalarini kengaytirish, yangi muzeylar qurish va yirik madaniy tadbirlarni o‘tkazish bo‘yicha amalga oshirilayotgan chora-tadbirlarni taqdim etdi. BMT Turizm rahbari bu islohotlarni yuqori baholadi va so‘nggi sakkiz yil ichida xorijiy sayyohlar oqimi olti baravar o‘sib, deyarli 12 million kishiga yetganini ta’kidladi.

Tomonlar 2030-yilga kelib sayyohlar sonini 20 millionga va turizmning YaIMdagi ulushini 7 foizga yetkazish rejalarini muhokama qildi. Shuningdek, 2023-yilda Samarqandda o‘tkazilgan BMT Turizmning Bosh Assambleyasi, Xalqaro Turizm Akademiyasining tashkil etilishi va yaqin kelajakda “Ipak yo‘li bo‘yicha turizm” mavzuidagi ofisning ochilishi kabi faol hamkorlik dinamikasi qayd etildi.

O‘zbekiston tashabbusi bilan BMT Bosh Assambleyasi tomonidan 2027-yil Barqaror va Bardoshli Turizm Xalqaro Yili deb e’lon qilinishi haqidagi rezolyutsiya qabul qilinganligi alohida ta’kidlandi. Uchrashuv yakunida qo‘shma loyihalarni amalga oshirish, huquqiy bazani takomillashtirish va soha uchun malakali kadrlar tayyorlashni o‘z ichiga olgan hamkorlikni rivojlantirishga tayyorlik tasdiqlandi.

Source: kun.uz