O‘zbekistonda ayollar tadbirkorligini rivojlantirishga qaratilgan global She’s Next tashabbusining birinchi bosqichi boshlandi. Visa kompaniyasi, Ipak Yuli Bank, Raqamli texnologiyalar vazirligi va Hamroh kompaniyasi hamkorligida amalga oshirilayotgan loyiha doirasida ayollar biznes loyihalarini rivojlantirish uchun grantlar va ta’lim dasturiga ega bo‘lish imkoniyatiga ega bo‘lishadi.

Tashabbus ishtirokchilari 2 apreldan 24 maygacha She’s Next platformasida ro‘yxatdan o‘tishlari kerak. Barcha ro‘yxatdan o‘tganlar 4 ta video-ma’ruza va 4 ta testdan iborat ta’lim dasturiga kirish huquqiga ega bo‘ladilar. Dasturni muvaffaqiyatli yakunlagan ishtirokchilar keyingi bosqichga o‘tib, o‘z biznes-rejalarini ekspertlar komissiyasiga taqdim etish imkoniyatiga ega bo‘lishadi.

30 nafar finalchi Toshkent shahrida bo‘lib o‘tadigan She’s Next Pitch Day final tadbiriga taklif qilinadi, u yerda 7 nafar g‘olib o‘z bizneslarini rivojlantirish uchun pul grantlarini qo‘lga kiritadi. O‘zbekiston uchun ajratilgan umumiy mukofot jamg‘armasi 22 000 AQSh dollarini tashkil etadi. Ipak Yuli Bank boshqaruv raisi o‘rinbosari Tursunboy Maxqamov tashabbusni ayollar uchun bilim, resurslar va imkoniyatlar platformasi sifatida ta’rifladi.

Visa Markaziy Osiyo bo‘yicha vitse-prezidenti Sanjar Suleymanov 2019-yildan beri dunyo bo‘ylab ayollarga biznes ochishda yordam berayotgan tashabbusning O‘zbekistonda birinchi marta “Boshlang!” shiori ostida amalga oshirilayotganini ta’kidladi. BMT hisobotiga ko‘ra, O‘zbekistonda 2,1 millionga yaqin ayol tadbirkor faoliyat yuritmoqda, bu 2020-yilga nisbatan etti baravar ko‘pdir. Raqamli texnologiyalar vazirligi maslahatchisi Kamola Sobirova ayollarga qo‘shimcha qo‘llab-quvvatlash zarurligini ta’kidladi.

Source: kun.uz