O‘zbekiston oliy ta’lim, fan va innovatsiyalar vaziri Kongratbay Sharipov 15-aprel kuni o‘tkazilgan matbuot anjumanida mamlakatdagi 26 ta oliy ta’lim muassasasi dotatsiyada qolganligini va ularni saqlab qolish uchun kontrakt to‘lovlari masalasini qayta ko‘rib chiqish zarurligini bildirdi. Vazirning ta’kidlashicha, avvalgi tizimda ish haqi va nafaqalar oshganda kontrakt miqdori ham oshar edi, ammo prezident talabalar ko‘proq o‘qishi va o‘z ustida ishlashi uchun imkoniyat yaratish maqsadida to‘rt yildan beri kontraktning oshishiga ruxsat bermayapti.

Sharipovning so‘zlariga ko‘ra, ayrim yo‘nalishlarda o‘qiydigan talabalar yiliga 6 million so‘m kontrakt to‘laydi, ammo ularning bir nafarini yillik xarajati 14 million so‘mni tashkil etadi. Qolgan 8 million so‘mni esa “super-kontrakt”da o‘qiydigan talabalar hisobidan qoplanmoqda. Vazir bu holatni yashirish kerak emasligini ta’kidladi va super-kontraktga kirish istagi yildan-yilga kamayayotganini, chunki oliy o‘quv yurtlari o‘rtasida raqobat kuchaygani va ko‘plab yoshlar xususiy universitetlarni afzal bilayotganini qo‘shimcha qildi.

Joriy yil kontrakt miqdorlari 20 foizgacha oshishi haqidagi tarmoq xabarlariga nisbatan Sharipov munosabat bildirib, hozircha bunday qaror qabul qilinmaganligini aytdi. U har bir oliy ta’lim muassasasining xarajatlari va daromadlari ijtimoiy tarmoqlarda yoritilayotganini, ammo kontrakt oshishi masalasi bo‘yicha jamoatchilik fikrini o‘rganib qaror qabul qilinishini ta’kidladi. Vazir shuni ham qo‘shimcha qildiki, universitetlarni saqlab qolish zarurati bo‘lsa, bu masala ustida o‘ylash lozim.

Matbuot anjumanida Sharipov forma masalasi haqida ham fikr bildirib, har bir oliy ta’lim muassasasi o‘z ichki tartib-qoidalarini ishlab chiqqanligini va rahbariyatning talabalar kiyimini talab qilish huquqiga ega ekanligini aytdi. U OTMlar orasida o‘z kiyim brendini yaratish tendentsiyasi ommalashayotganini va kiyinishda tartib bo‘lishi kerakligini ta’kidladi.

Source: www.gazeta.uz