O‘zbekiston, Toshkent – Dunyo Banki Prezidenti Ajay Banga O‘zbekiston Bosh vazir o‘rinbosari – iqtisodiyot va moliya vaziri Jamshid Kuchkarov bilan uchrashuv o‘tkazdi. Uchrashuv ikki tomonlama hamkorlikni mustahkamlash va respublika aholisining farovonligini oshirishga qaratilgan keng qamrovli ijtimoiy-iqtisodiy islohotlarni qo‘llab-quvvatlashga bag‘ishlandi.

Muhokamada Dunyo Bankining yuqori martabali vakillari, jumladan, Yevropa va Markaziy Osiyo mintaqasi bo‘yicha vitse-prezident Antonella Bassani va operatsiyalar bo‘yicha boshqaruvchi direktori Anna Berde ishtirok etdi. Tomonlar O‘zbekistonning joriy iqtisodiy o‘sish sur’atlarini, shuningdek, qashshoqlikni qisqartirish va asosiy infratuzilma sohalarini modernizatsiya qilish choralari natijalarini tahli qildi.

Suhbat davomida Xalqaro Taraqqiyot Assotsiatsiyasi (IDA) doirasidagi hamkorlikni kengaytirishga alohida e’tibor qaratildi. Tomonlar ijtimoiy ahamiyatga ega tashabbuslarni amalga oshirish uchun imtiyozli moliyalashtirishni samarali qo‘llash mexanizmlarini muhokama qildi. Shuningdek, iqlim barqarorligi mavzusi ham ko‘rib chiqildi: Water Forward tashabbusi doirasida suv resurslarini boshqarish va iqlim o‘zgarishlariga moslashish sohasidagi o‘zaro hamkorlikni kuchaytirish bo‘yicha choralar belgilandi.

Iqtisodiyot va moliya vazirligi kichik va o‘rta biznesni rivojlantirishni joriy islohotlar bosqichining ustuvor yo‘nalishlaridan biri sifatida ajratib ko‘rsatdi. Dunyo Banki vakillari O‘zbekistonning xususiy sektoriga har tomonlama yordam ko‘rsatishga tayyorligini tasdiqladi. Uchrashuv natijasida yangi qo‘shma loyihalarni ishga tushirish bo‘yicha kelishuvlarga erishildi, ular uzoq muddatli va o‘zaro manfaatli hamkorlikning mantiqiy davomi bo‘ladi.

Source: podrobno.uz