️ Urbanizatsiya va uy-joy bozorini barqaror rivojlantirish milliy qo‘mitasi raisi Sherzod Kudbiyev ijtimoiy tarmoqlarda uning qimmatbaho soati atrofida tarqalgan xabarlarga izoh berdi. Muhokamalar uning yig‘ilishlardan birida ko‘rinish bergan soati tufayli boshlandi, blogerlar va foydalanuvchilar uni lyuks model (masalan, Vacheron Constantin Overseas yoki Breguet Marine) sifatida aniqlab, narxini 50 ming dollarga baholashdi.
️ Jurnalist Ilyos Safarov bu holatni davlat xizmatchilarining mol-mulkiga jamiyat e’tiborini qaratish demokratik norma ekanligini ta’kidladi. Uning fikricha, Kudbiyevning sukut saqlashi hokimiyatga bo‘lgan ishonchsizlikni kuchaytiradi. Safarov: “Davlat xizmatchisi xalq soliqlari hisobidan oylik oladi va har bir tiyini uchun hisob berishi kerak. Shu ma’noda, soatning narxi va manbasi surishtirilishi ‘shaxsiy hayotga aralashish’ emas, balki korrupsiyaga qarshi immunitetni tekshirishdir”, dedi. U tizimli muammo – amaldorlarning daromadlari va mol-mulkini deklaratsiya qilishning ishlovchi mexanizmi yo‘qligiga e’tibor qaratdi.
️ Kudbiyev videomurojaatda javobning kechikishini ish hajmining ko‘pligi va “stress” bilan bog‘ladi. U: “Ilyos akam Safarovning tahlili juda o‘rinli bo‘ldi. Bu soat menga juda qadrli, lekin davlat xizmatchisi avvalambor kamtar bo‘lishi kerak”, dedi. Qo‘mita rahbari amaldorlar kasbiy etikaga, ayniqsa ommaviy tadbirlarda qat’iy rioya qilishlari zarurligini ta’kidladi va kelgusida faqat vatan ravnaqi yo‘lida ishlashni maqsad qilganini aytdi.
️ Muhokama davlat xizmatchilarining daromadlari va mol-mulkini deklaratsiya qilish tizimining kechikishi masalasini yana bir bor ko‘tardi. 2017-yilda qabul qilinishi rejalashtirilgan qonun bir necha bor surildi, 2022-yil 1-yanvardan boshlash rejasi amalga oshmadi. 2024-yilda Korrupsiyaga qarshi kurashish agentligi qonun loyihasi deyarli tayyor ekanini ma’lum qildi, 2025-yil mart oyida prezident jamoatchilik muhokamasi uchun qisqa muddat bergan, biroq bu ham amalga oshmadi. Aprel oyida Gazeta ma’lumotlarning 6 toifasini oshkor qilish, 20 tasini yopiq qoldirish taklif etilayotganini aniqladi, bu ochiqlikning cheklanganligini ko‘rsatadi.
Source: www.gazeta.uz