Jahon chempionatining asosiy favoriti hisoblanuvchi Ispaniya terma jamoasi hujumchi Lamine Yamalni yo‘qotish xavfiga duch keldi. 18 yoshli yulduz chorshanba kuni La Ligada “Barselona” safida “Selta Vigo”ga qarshi o‘yinda jarohat oldi.

Klub rasmiylarining ma’lum qilishicha, Yamal son paychasini yirtib olgan bo‘lishi mumkin. To‘liq tashxis payshanba kuni skanerdan o‘tkazilgandan so‘ng ma’lum bo‘ladi.

Yamal 40-daqiqada penaltidan gol urdi, ammo nishonlangan zahoti chap son paychasini ushlab yiqildi. “Barselona” bosh murabbiyi Xansi Flik: “Kutishimiz kerak. U nimadir his qildi. Gol urganidan keyin sababsiz maydonni tark etmagan bo‘lardi. Umid qilamizki, jiddiy emas”, dedi.

Yamalning “Barselona” va Ispaniya termasidagi jamoadoshi Pedri: “Umid qilamanki, Lamine bir necha haftagina safdan chiqadi. U yosh va tez tuzaladi”, deya izoh berdi.

Bu gol Yamalning mavsumdagi 16-La Liga goli bo‘ldi va “Barselonaga” 1:0 hisobida g‘alaba keltirdi. Klub ikkinchi o‘rindagi “Real Madrid”dan 9 ochko oldinda, shuning uchun Yamalning sog‘lig‘idan qat’i nazar, chempionlik yo‘lida ishonchli qadam tashlamoqda.

Asosiy savol – bu jarohat Ispaniyaning Shimoliy Amerikadagi Jahon chempionatidagi imkoniyatlariga ta’sir qiladimi? Ispaniya 15-iyun kuni Atlanta shahrida Kabo-Verde, 21-iyun kuni Saudiya Arabistoni bilan o‘ynaydi, 26-iyun kuni esa Meksikaning Zapopan shahrida Urugvayga qarshi maydonga tushadi.

Ispaniya Yevro-2024da o‘sha paytda 16 yoshli Yamalning hissasi bilan g‘olib bo‘lgan edi. Yamal terma jamoadagi 25 o‘yinda 6 gol urgan.

Source: www.aljazeera.com