Meksikaning eng qudratli uyushgan jinoyatchilik guruhi bo'lgan Jalisko Yangi Avlod Karteli (CJNG) yana bir katta zarbaga uchradi. Meksika harbiylari kartelning yuqori martabali qo'mondonlaridan biri Audias Flores Silvani qo'lga oldi.

«El Jardinero» (Bog'bon) laqabi bilan tanilgan Flores kartel rahbari Nemesio Oseguera Servantesning («El Mencho») fevral oyida o'ldirilishidan so'ng uning vorisi sifatida ko'rilgan edi.

AQSh 2025-yilda CJNGni terrorchi tashkilot deb e'lon qilgan va Floresning hibsga olinishiga olib keladigan ma'lumot uchun 5 million dollar mukofot va'da qilgan edi.

El Menchoning o'limi Meksikada kartel zo'ravonligining kuchayishiga olib keldi, jumladan, qurolli shaxslar tomonidan biznesga hujumlar, avtomobillarni yoqish va yo'llarni to'sish holatlari ko'paydi. 70 dan ortiq odam, jumladan 25 Milliy gvardiya xodimi halok bo'ldi.

Meksika harbiy-dengiz kuchlari Silvaning qo'lga olinishidan so'ng u «zo'ravonlikning asosiy generatorlaridan biri sifatida aniqlanganini» ma'lum qildi. Operatsiya 19 oylik kuzatuvdan so'ng «birorta ham o'q uzilmagan holda jarrohlik aniqligi bilan» amalga oshirilgan.

Floresning Meksikada yoki AQShda sud qilinishi hozircha noma'lum. U AQShga ekstraditsiya qilish uchun qidirilmoqda.

Sobiq DEA maxsus agenti Karlos Olivoning so'zlariga ko'ra, Floresning hibsga olinishi «CJNG operatsiyalariga El Menchoning o'ldirilishidan ko'ra ko'proq ta'sir ko'rsatadi».

Source: www.dw.com