O‘zbekistonda ayollar salomatligiga jiddiy xavf solayotgan ko‘krak bezi saratoni kasalligi bo‘yicha xabardorlik oyi o‘tkazilmoqda. Xalqaro saratonni o‘rganish agentligi ma’lumotlariga ko‘ra, 2024-yilda mamlakatda 4793 ta yangi kasallanish holati qayd etilgan bo‘lib, 2085 nafar ayol ushbu og‘ridan vafot etgan. Mutaxassislar bu borada erta tashxislash va skrining dasturlarining ahamiyati yuqoriligini ta’kidlashmoqda.

Respublika ixtisoslashtirilgan onkologiya va radiologiya ilmiy-amaliy tibbiyot markazi shifokori Lola Zokirovaning ta’kidlashicha, kasallikning kelib chiqishiga irsiy moyillik, gormonal o‘zgarishlar, semizlik va reproduktiv omillar ta’sir qiladi. 30 yoshdan 45 yoshgacha bo‘lgan ayollar xavf guruhiga kirishadi, shuningdek, erkaklarda ham kamdan-kam holatlarda bu kasallik kuzatilishi mumkin. Bemorlarning aksariyati avvallari kasallikning so‘nggi bosqichlarida murojaat qilgan bo‘lsa, bugungi kunda ikkinchi bosqichda aniqlash ko‘rsatkichi 50,8 foizga yetgan.

Shifokorlar ayollarning o‘z vaqtida shifokorga ko‘rinmasdan, tabiblarga murojaat qilishini eng og‘riqli muammolardan biri sifatida ko‘rsatishmoqda. Giyohlar va malhamlar yordamida davolanishga urinish o‘smaning yanada kattalashishiga va teriga yorib chiqishiga olib keladi. Shuningdek, kimyoterapiya va soch to‘kilishidan qo‘rqish ham ko‘plab bemorlarni tibbiy yordamdan qochishga majbur qilmoqda.

Prezidentning 402-son qaroriga muvofiq, mamlakatda skrining tizimini rivojlantirish choralari ko‘rilmoqda. Prezident huzuridagi Strategik rivojlanish va islohotlar agentligi vakili Dilfuza Aniyozovaning ma’lum qilishicha, hududlardagi tibbiyot muassasalariga zamonaviy mammograflar o‘rnatilib, chekka tumanlardagi ayollar uchun ham bepul tekshiruvlardan o‘tish imkoniyatlari kengaytirilgan.

Source: www.gazeta.uz