O'zgidromet bergan ma'lumotlarga ko'ra, joriy yilning 30-oktabr kuni respublika hududida asosan kam bulutli va iliq ob-havo kuzatilishi kutilmoqda. Sinoptiklarning ta'kidlashicha, bu davrda yog'ingarchiliklar umuman prognoz qilinmayapti, kunduzgi vaqtda esa havo harorati sezilarli darajada ko'tarilib, +17 va +22 darajagacha iliq bo'ladi.

Mutaxassislarning xabar qilishicha, kelgusi dam olish kunlarida mamlakatda o'zgaruvchan bulutlilik saqlanib turadi, asosiy hududlarda yog'ingarchilik kutilmaydi. Biroq, 31-oktabr kuni Qashqadaryo, Surxondaryo, Samarqand, Jizzax viloyatlarining ayrim tumanlarida hamda kechga tomon Toshkent viloyatida, shuningdek, 1-noyabrga o'tar kechasi va ertalab Farg'ona vodiysi viloyatlarining ayrim joylarida biroz yomg'ir yog'ishi ehtimoli bor. Respublika tog'li hududlarida esa yog'ingarchilik qorga aylanishi mumkinligi aytilmoqda.

Sinoptik ma'lumotlariga ko'ra, respublika bo'ylab havo harorati kechasi +5...+10 daraja atrofida, shimoliy hududlarda 0...+5 darajagacha sovuqroq, kunduzi esa +17...+22 daraja iliq bo'lishi taxmin qilinmoqda. Shamol sharqdan 7-12 m/s tezlikda esishi kutilmoqda.

Poytaxt Toshkent shahrida ham 30-31-oktabr kunlari quruq va yog'ingarchiliksiz ob-havo qaror topadi. Shunga qaramay, 1-noyabrga o'tar kechasi va ertalab biroz yomg'ir yog'ish ehtimoli istisno qilinmaydi, sharqdan esuvchi shamol tezligi 3-8 m/s ni tashkil etadi. Toshkentda havo harorati kechasi +8...+10, kunduzi esa +20...+22 darajagacha iliq bo'lishi kutilmoqda.

Source: uznews.uz